सिद्धार्थ हस्पिटालिटीले नेपाली खाना प्रवर्द्धन गर्ने उद्देश्यले पाककला प्रतियोगिता 'नेपाल करी सेफ अफ द इयर २०२४' आयोजना गर्ने भएको छ।
विजेताले २०२४ को सेप्टेम्बरमा बेलायतमा हुने 'ग्रेट ब्रिटिस करी फेस्टिवल' मा यातायात र आवाससहित सहभागी हुने अवसर पाउनेछन्।
प्रतियोगिता विश्व प्रसिद्ध सेफ टमी मियाको 'ग्रेट ब्रिटिस करी फेस्टिवल' सँगको सहकार्यमा आयोजना गर्न लागिएको हो।
प्रतियोगितामार्फत् नेपाली खानाको महत्त्व र इतिहासलाई विश्वभर चिनाइने लक्ष्य लिइएको छ।
नेपाली खानाको परम्परालाई अन्तर्राष्ट्रिय स्तरमा प्रवर्द्धन तथा नेपाली सेफहरूको प्रतिभा चिनाउन प्रतियोगिता आयोजना गरिएको नेपालको लोकप्रिय चेन हस्पिटालिटी ब्रान्ड सिद्धार्थ हस्पिटालिटीका सिइओ सन्तोष न्यौपानेले जानकारी दिए।
प्रतियोगिताले नेपाली सेफहरूको प्रतिभा र सीप प्रवर्द्धन गर्दै अन्तर्राष्ट्रिय मान्यता प्राप्त गर्नका लागि पनि सहयोग पुर्याउने न्यौपानेको भनाइ छ।
नेपाल पर्यटन बोर्ड समेतको आवद्धतामा आयोजना गरिएको प्रतियोगितामा सहभागी हुन इच्छुकले सिद्धार्थ ग्रुप अन्तर्गतका विभिन्न होटल, रेस्टुरेन्ट तथा क्याफेहरूमार्फत् आवेदन दर्ता गर्न सक्छन्।
साथै, इसेवामा नेपाल करी सेफ अफ द इयर सर्च गरी अनलाइन फारम भरेर पनि सहभागी हुन सकिने कार्यक्रम संयोजक दुर्गादत्त पन्तले बताए।
आन्तरिक प्रतियोगितामा छनौट भएकाहरूको अन्तिम चरणको प्रतिस्पर्धा र बिजेता घोषणा अगस्ट २४ मा काठमाडौंमा हुनेछ।
