नेपाल नागरिक उड्डयन प्राधिकरणले नेपाल एयरलाइन्सका क्याप्टेन विजय लामालाई उडानमा लगाएको प्रतिबन्ध फुकुवा गरेको छ।
उडान तथा यात्रु सुरक्षाका लागि निषेध गरिएका गतिविधि पटक-पटक दोहोर्याएको जनाउँदै प्राधिकरणले तीन साताअघि क्याप्टेन लामालाई उडानमा प्रतिबन्ध लगाएको थियो।
अन्तर्राष्ट्रिय नागरिक उड्डयन संगठन तथा प्राधिकरणले निर्धारण गरेका मापदण्ड तथा सिफारिसको परिपालना नभएको अभियोगमा प्राधिकरणले उड्डयन सुरक्षा विभागका निर्देशक विक्रमराज गौतमको संयोजकत्वमा तीन सदस्यीय छानबिन समिति बनाएको थियो।
उक्त छानबिन समितिले निष्कर्ष बमोजिम क्याप्टेन लामालाई जरिवाना र गल्ती नदोहोर्याउने सर्तमा उडानमा लगाएको प्रतिबन्ध फुकुवा गरेको हो।
