सुनसरीमा निर्मित फाइभ स्टार होटल ग्राण्ड सेन्ट्रल होटल प्रालिले 'आइआरएन बीबी (डबल बी माइनस)' र 'आइआरएन ए४' रेटिङ प्राप्त गरेको छ।
इन्फोमेरिक्स क्रेडिट रेटिङ नेपालबाट कम्पनीले उक्त रेटिङ प्राप्त गरेको हो।
नेपाल उद्योग वाणिज्य महासंघका पर्यटन तथा हवाई यातायात समितिका सभापति देशबन्धु बस्नेत (अजित)को एकल लगानीमा सञ्चालनमा आउन लागेको उक्त होटलले सो रेटिङ पाएसँगै डलब बी माइनसबाट दीर्घकालका लागि ८० करोड ३० लाख रूपैयाँ बैंक कर्जा सुविधा र दोस्रो रेटिङमार्फ छोटो अवधिका लागि ३ करोड रपैयाँ बराबरको कर्जा सुविधा लिन सक्ने भएको छ।
विन्धाम होटल एसिया प्यासिफिक प्रालिबाट मान्यता प्राप्त उक्त होटललाई होटलको स्थान र निर्माण सक्रियता, विदेशी होटलबाट मान्यता प्राप्त र लगानीकर्ताको सफलताका आधारमा उक्त रेटिङ दिइएको रेटिङ प्रदायक कम्पनी इन्फोमेरिक्सले जानकारी दिएको छ।
यस्तै कम्पनीलाई दिइएको उक्त रेटिङ कम्पनीका लगानीकर्ताहरूको अनुभव, पर्यटन र सेवा क्षेत्रलाई सरकारले दिइएको प्राथमिकतालगायतलाई पनि आधारमा लिएर दिइएको बताइएको छ।
उक्त होटललाई एबी इन्भेष्टमेन्ट होल्डिङ्सका अध्यक्ष देशबन्धु बस्नेतले एकल लगानीमा निर्माण गर्दै आएका छन्। उनको इन्भेष्टमेन्ट कम्पनीले सेवा तथा पर्यटन क्षेत्रका धेरैजसो परियोजनाहरूमा प्रत्यक्ष लगानी र परियोजनाहरू निर्माण गर्दै आइरहेको छ।
उक्त होटलले प्रतिष्ठित विदेशी चेन होटल विंडहामसँगको सहकार्यमा रमाडा ब्राण्डलाई भित्र्याएको छ। विन्धाम होटलका विश्वभर ९५ देशमा ९ हजार एक सय होटलहरू सञ्चालित छन्।
अध्यक्ष बस्नेतसँग यस्ता परियोजनामा काम गरेको लामो अनुभव र सफलतालाई हेरेर नै उनको होटलले उक्त रेटिङ पाएको बताइएको छ।
इटहरीमा रहेको ग्राण्ड सेन्ट्रल होटलले यसअघि नै विन्डहाम होटल्स एण्ड रिसोर्टसँग इटहरीमा ‘विंडहाम होटल बाइ रमाडा’ सञ्चालनका लागि फ्रेन्चाइजी सम्झौतामा हस्ताक्षर गरिसकेको छ। उक्त सम्झौतापत्रमा ग्राण्ड सेन्ट्रल होटल प्रालिका अध्यक्ष वस्नेत र युरेसियाका मार्केटिङ प्रबन्ध निर्देशक निखिल शर्माले हस्ताक्षर गरेका हुन्।
यस्तै होटलको कुल लगानी १ अर्ब ७ करोडमा रहेको छ। होटललाई २०२५ को मध्यतिर सफ्ट लञ्च गरिसक्ने लक्ष्य लिएको छ भने पूर्ण रुपमा २०२६ को सुरुवातमै पूर्ण सञ्चालनमा आइसक्ने बताइएको छ।
होटलको वित्तीय र भौतिक प्रगतिसँगै आगामी योजना हेरेरै इन्फोमेरिक्सले होटललाई उक्त रेटिङ दिएको बताइएको छ। यस्तै होटल रहेको स्थान पनि नेपाल भारत सीमाभन्दा ३० किलोमिटरकै दूरीमा रहेकाले यसले भारतीय पर्यटकहरूलाई लक्षित गरेको बताइएको छ।
