पर्यटन प्रवर्द्धनका लागि होटल संघ नेपालले चीनमा कार्यक्रम गर्ने भएको छ।
संघले चिनियाँ पर्यटक भित्र्याउने साथै नेपाली र चिनियाँ पर्यटन व्यवसायीबीच सम्बन्ध विस्तार गर्ने उद्देश्यका साथ बेइजिङ र छेन्दुमा यही जेठ १९ देखि २५ गतेसम्म नेपाल प्रवर्द्धनात्मक कार्यक्रम आयोजना गर्ने भएको हो।
कोभिड संक्रमणपछि पहिलो पटक हुन लागेको यस कार्यक्रमको होटल संघ नेपालका अध्यक्ष विनायक शाहको नेतृत्वमा सातै प्रदेशका ७५ सदस्य होटलहरू सम्मिलित नेपाली प्रतिनिधिमण्डल शनिबार (भोलि)चीन प्रस्थान गर्ने कार्यक्रम रहेको छ।
कोभिडपछि चिनियाँ पर्यटकहरूको नेपाल भ्रमणमा उल्लेख्य वृद्धि हुँदै आएको क्रममा नेपाली प्रतिनिधिमण्डलले प्रतिष्ठित चिनियाँ ट्राभल तथा टुर अपरेटरहरूसँग गर्ने बिटुबी मिटिङ तथा नेपाल प्रवर्द्धनात्मक कार्यक्रमबाट चिनियाँ पर्यटक बढाउन प्रत्यक्ष योगदान पुग्ने संघको अपेक्षा छ।
बेइजिङ र छेन्दुमा होटल संघ नेपाल र समकक्षी चाइना होटल संघ तथा आर्थिक तथा पर्यटन गतिविधिसँग संलग्न संघ संस्थाबीच तालिम, प्रशिक्षणका साथै दुईपक्षीय पर्यटन प्रवर्द्धनसम्बन्धी सम्झौतापत्रमा हस्ताक्षर हुने कार्यक्रम पनि रहेको छ।
उक्त कार्यक्रमको समन्वय बेइजिङस्थित नेपाली राजदूतावास तथा छेन्दुस्थित महावाणिज्यदूतको कार्यालय तथा नेपालको पर्यटनसम्बन्धी प्रस्तुतीकरण नेपाल पर्यटन बोर्डबाट हुने पनि संघका महासचिव साजन शाक्यले बताए।
