द ब्रिटिस कलेजको आयोजनामा भएको ‘छैटौं ब्रिटिस कप २०२५’ अन्तर–कलेज फुटसल प्रतियोगिता सम्पन्न भएको छ।
प्रतियोगिता भदौ ९ देखि १३ सम्म काठमाडौंको बालुवाटारस्थित धुकु स्पोर्ट्स हबमा आयोजना गरिएको थियो।
हाई स्कूलतर्फ चेल्सी इन्टरनेशनल एकेडेमी र ब्याचलरतर्फ इनसाइट भिजनले उपाधि हात पारेका छन्।
हाई स्कूलको फाइनल खेलमा चेल्सीले डिएभी कलेजलाई पराजित गर्दै १ लाख रुपैयाँ पुरस्कार जित्यो भने डिएभीले उपविजेताको रूपमा ५० हजार रुपैयाँ प्राप्त गर्यो।
व्यक्तिगत पुरस्कारहरूमा चेल्सी एकेडेमीका बिमर्श बम ठकुरी उत्कृष्ट खेलाडी, यशराज साह उत्कृष्ट गोलकिपर, रिजन महर्जन सर्वाधिक गोलकर्ता (११ गोल) बने भने रोम्बस सेकेन्डरी स्कुलले फेयर प्ले अवार्ड प्राप्त गर्यो। प्रत्येक व्यक्तिगत विजेताले ५ हजार रुपैयाँ प्राप्त गरेका छन्।
ब्याचलर तहमा इनसाइट भिजन ले न्याथमलाई हराउँदै च्याम्पियन बनेर १ लाख रुपैयाँ पुरस्कार जित्यो भने न्याथमले ५० हजार रुपैयाँ प्राप्त गर्यो। यस तहमा रबिन चौलागाईं उत्कृष्ट खेलाडी, सुजन बराम उत्कृष्ट गोलकिपर, विविध विष्ट सर्वाधिक गोलकर्ता बने भने लिटिल एन्जल्स कलेजले फेयर प्ले अवार्ड विजेता बने। व्यक्तिगत पुरस्कारको रकम १०/१० हजार रुपैयाँ प्रदान गरिएको थियो।
द ब्रिटिस कलेजका संस्थापक एवं प्रमुख कार्यकारी अधिकृत राजेन कँडेलले प्रतियोगितामा योगदान गर्ने विद्यार्थी, स्वयंसेवक र सहभागी सबैलाई धन्यवाद दिए।
उनले आगामी वर्ष सातौं ब्रिटिस कप २०२६ मा काठमाडौं बाहिरका कलेजलाई समेत सहभागी गराउने योजना रहेको जानकारी गराए।
-1746009348.jpg)
