इलामको माईखोलामा आएको बाढीले क्षति पुर्याएको काबेली करिडोर १३२ केभी डबल सर्किट प्रसारण लाइनको पुनर्निर्माणको काम धमाधम भइरहेको नेपाल विद्युत प्राधिकरणले जनाएको छ।
नेपाल विद्युत प्राधिकरण र काबेली करिडोर प्रसारण लाइनमा विद्युत जोडिएका निजी क्षेत्रका २० जलविद्युत आयोजनाले संयुक्त रूपमा प्रसारण लाइन पुनर्निर्माण तथा पुनस्थापनाको काम गरिरहेका छन्। प्रसारण लाइन पुनर्निर्माण तिहारअघि नै सम्पन्न गर्ने गरी काम भइरहेको छ।
प्राधिकरणले प्रसारण लाइनका पाटपुर्जाहरू लगायत सामग्रीहरू उपलब्ध गराएको छ। निजी क्षेत्रका जलविद्युत आयोजनाले श्रम लागत खर्च ब्यहोरेका छन्।
यसका लागि प्रत्येक आयोजनाले निश्चित रकम योगदान गरेका छन्। प्राधिकरण र निजी क्षेत्रले संयुक्त रूपमा पुनर्निर्माण अगाडि बढाएका हुन्।
निजी क्षेत्रले ऊर्जा उद्यमी मोहन कार्कीको नेतृत्वमा टोली खटाएका छन्।
गत असोज १२ गते शनिबार माईखोलामा आएको बाढीले काबेली करिडोर प्रसारण लाइनअन्तर्गत इलामको माई नगरपालिका वडा नम्बर १ र ७ धोद्रेबेँशीमा ४ वटा टावरमा क्षति पुर्याएको थियो।
ताप्लेजुङ, पाँचथर र इलाममा सञ्चालनमा रहेका २० वटा जलविद्युत आयोजनाको करिब २०० मेगावाट विद्युत प्रवाह हुने काबेली प्रसारण लाइनमा क्षति पुगेपछि १२ असोजबाट ती आयोजनाको विद्युत उत्पादन बन्द छ।
विद्युत उत्पादन बन्द हुँदा निजी क्षेत्रका जलविद्युत आयोजनाहरूले दैनिक आम्दानी गुमाइरहेका छन्।
काबेली करिडोर प्रसारण लाइनअन्तर्गत इलामको गोदकबाट झापाको दमकसम्मको खण्डको धोद्रेबेँशीमा ५०, ५१, ५२ र ५३ नम्बर टावरलाई माईखोलाको बाढीले क्षति पुर्याएको थियो।
उक्त स्थानबाट प्रसारण लाइनलाई माईखोला पार गराएको थियो। उक्त स्थानमा प्रसारण लाइनको स्पान साढे सात सय मिटर छ।
चारवटा टावरमध्ये बाढीले ५१ र ५२ नम्बर टावरलाई पूर्ण रूपमा क्षति पुर्याएको थियो। बाढीले उक्त टावर ढालेका थियो। अहिले पूर्ण क्षति पुर्याएको टावरको जग हाल्ने काम भइरहेको छ। टावरका सम्पूर्ण पाटपूर्जाहरू निर्माण स्थलमा ढुवानी भइसकेको छ।
५० र ५३ नम्बर टावरमा आंशिक क्षति पुगेको थियो। ५० नम्बर टावरको टुप्पोको संरचनामा क्षति पुगेको थियो। ५३ नम्बर टावरको क्रस आर्म र टुप्पोको संरचनामा क्षति पुगेको थियो। दुवै टावरको मर्मत सकिएको छ।
प्राधिकरणका कार्यकारी निर्देशक कुलमान घिसिङले शुक्रबार पुनर्निर्माण स्थलको अनुगमन गरी तोकिएकै समयमा काम सम्पन्न गर्न आवश्यक सहयोग र सहजीकरण गर्ने प्रतिबद्धता जनाए।
'काबेली करिडोर प्रसारण लाइन बन्द हुँदा मुलुकको एकीकृत विद्युत प्रणालीकै विश्वसनीयता प्रभावित भइरहेको छ, निजी क्षेत्रका जलविद्युत आयोजनाले दैनिक ठूलो आम्दानी गुमाइरहेका छन्, उत्पादन बन्द हुँदा भारतर्फको विद्युत निर्यात प्रभावित भइरहेको छ,' कार्यकारी निर्देशक घिसिङले भने, 'यसबाट सबैलाई ठूलो क्षति भइरहेको छ, त्यसैले जतिसक्दो छिट्टो पुनर्निर्माण सम्पन्न गरी लाइन सञ्चालनमा ल्याउने गरी सबैले काम गरौं।'
निजी क्षेत्रका तर्फबाट पुनर्निर्माणमा खटेका कार्कीले सम्पूर्ण काम सकेर तिहारअघि नै विद्युत प्रसारण सुरू गर्ने गरी काम भइरहेको बताए।
वडा नम्बर १ का वडाध्यक्ष राम बहादुर राईले प्रसारण लाइनमा सञ्चालन हुन नसक्दा राज्यलाई नै ठूलो क्षति भइरहेकाले पुनर्निर्माणमा वडाकातर्फबाट पूर्ण रूपमा सहयोग गरिररहेको बताए।
