तोक्मा टेक्नोलोजीले 'तोक्मा' सुपर एप र 'जिकार्ड' डिजिटल कार्ड सार्वजनिक गरेको छ।
यो एपले एउटै प्लेटफर्मबाट राइड सेयरिङ, टुर गाइड, सपिङ, सेक्युरिटी र केयर गिभरजस्ता सेवा दिने कम्पनीले जनाएको छ।
जिकार्डले एनएफसी (छोटो दुरीको वायरलेस) प्रविधिमार्फत मोबाइल ट्याप गरेर व्यक्तिगत वा व्यावसायिक विवरण सजिलै सेयर गर्न सकिने जनाइएको छ।
यसले भौतिक भिजिटिङ कार्डको आवश्यकता हटाउने र डिजिटल इकोनोमीमा योगदान गर्ने, रोजगारी सिर्जना गर्ने र दैनिक जीवन सहज बनाउन सहयोग पुग्ने कम्पनीको दाबी छ।
एक सार्वजनिक कार्यक्रममा नेपाल विद्युत प्राधिकरणका पूर्व प्रबन्ध निर्देशक कुलमान घिसिङले यो एप र जिकार्डले डिजिटल इकोनोमीमा ठूलो योगदान दिने र रोजगारीका अवसर सिर्जना गर्ने बताए।
उनले दैनिक काममा प्रभावकारिता ल्याउने भएकाले सबैलाई यो प्रविधि प्रयोग गर्न आग्रह गरे।
कम्प्युटर एसोसिएसन अफ नेपाल क्यान महासंघका उपाध्यक्ष चिरञ्जीवी अधिकारीले नवप्रवर्तन आजको युगमा अनिवार्य भएको बताए। उनले स्टार्टअपहरू डिजिटल नेपालका आधार भएको उल्लेख गरे।
तोक्मा टेक्नोलोजीका सह–संस्थापक सञ्चमान राईले तीन वर्षको अनुसन्धानपछि यी प्रडक्ट ल्याइएको जानकारी दिए।
उनले प्रयोगकर्ताको सुझावअनुसार सुधार गर्दै जाने प्रतिबद्धता जनाए।
प्रमुख कार्यकारी अधिकृत सागर आङ्गेदम्बेले तोक्मा र जिकार्डलाई नेपालको डिजिटल परिवर्तनको संवाहकको रूपमा प्रस्तुत गरे।
सहरी यातायात प्राधिकरणका प्रमुख कार्यकारी अधिकृत कुबेर नेपालीले राइड सेयरिङले सार्वजनिक यातायातमा सहजता ल्याएको बताए।
तोक्माका ब्राण्ड एम्बेस्डर विल्सन बिक्रम राईले स्वदेशी प्रविधिको प्रयोग गर्न सबैलाई आह्वान गरे।
तोक्मा एपले एकै ठाउँमा धेरै सेवा समेटेर प्रयोगकर्ताको समय र झन्झट बचत गर्ने कम्पनीको दाबी छ।
जिकार्डले एनएफसी सपोर्ट गर्ने मोबाइलमा ट्याप गरेर विवरण सेयर गर्न सकिने उल्लेख गरिएको छ।
प्रयोगकर्ताले आवश्यकताअनुसार जिकार्डको जानकारी परिवर्तन गर्न सक्ने र यसले कागजी कार्डको प्रयोग घटाएर वातावरण संरक्षणमा पनि योगदान पुग्ने बताइएको छ।
