एनसेलले बढ्दो मोबाइल डेटाको मागलाई सम्बोधन गर्ने उद्देश्यका साथ ‘९० अनलिमिटेड’ र ‘५० डेटा’ गरी दुई डेटा प्याकहरू सञ्चालनमा ल्याएको छ।
यी प्याकहरू ग्राहकहरूलाई सधैं अन राख्न योगदान पुर्याउने कम्पनीको प्रतिबद्धता अनुरुप ल्याइएका हुन्।
कर सहित ९० रूपैयाँ शुल्क रहेको ९० अनलिमिटेड योजनाअन्तर्गत ग्राहकहरूले दुई दिनसम्म मोबाइल डेटाको अनलिमिटेड मोबाइल इन्टरनेटको फाइदा लिन सक्छन्।
ग्राहकहरूलाई डेटा सहजताको अनुभव प्रदान गर्ने उद्देश्यले डिजाइन गरिएको यो अफरले अनलिमिटेड इन्टरनेट प्रयोगको सुविधा सुनिश्चित गर्छ, जसले गर्दा ग्राहकहरू उच्च गतिको मोबाइल ब्रोडब्यान्ड सेवामार्फत सहजै सम्पर्कमा रहन सक्छन्।
यो अफर विषेशत छोटो अवधिको लागि बिना झन्झट इन्टरनेट पहुँच खोज्ने प्रयोगकर्ताहरूका लागि उपयुक्त विकल्प रहेको कम्पनीको भनाइ छ।
ग्राहकहरूले एनसेल एपमार्फत वा *१२३*४*१*४# डायल गरेर यो '९० अनलिमिटेड' प्याक लिन सक्छन्।
कामका लागि होस् वा मनोरञ्जनका लागि, फिल्म होस् वा अनलाइनमार्फत गीतसंगीतको आनन्द लिन वा सामाजिक सञ्जाल जोडिन यो प्याकले ४८ घण्टासम्म कुनै पनि डेटा सीमा बिना निर्बाध रूपमा इन्टरनेट सेवा प्रदान गर्दछ।
यस्तैगरी, '५० डेटा' प्याक अन्तर्गत ग्राहकले १.१ जिबी मोबाइल डेटा भोल्युम कर सहित मात्र ५० रूपैयाँमा पाउन सक्छन्।
यो डेटा तीन दिनसम्म मान्य रहन्छ। सुलभ शुल्कमा लामो ३ दिनसम्म प्रयोग गर्न सकिने सुविधा भएकोले यसले डेटा चाहिने तर थोरै प्रयोग गर्ने ग्राहकहरूलाई विषेश महत्त्व राख्दछ।
ग्राहकहरूले एनसेल एपबाट वा *१२३*४*२*१# डायल गरेर यो प्याक खरिद गर्न सक्छन्।
यो प्याक इन्टरनेट ब्राउजिङ, मोबाइलमार्फत डिजिटल कारोबार गर्न तथा स्पोटिफाई जस्ता प्लेटफर्महरूमा गीतसंगीतको मजा लिने लगायतका कार्यका लागि उपयुक्त हुने कम्पनीले बताएको छ।
