आइटी उद्यमी तथा नास आइटीका उपाध्यक्ष गौरव पाण्डेले आइटी उद्यमको लागि नेपालमा वातावरण बन्दै गएको बताएका छन्।
पछिल्लो समय नेपालमा नै बसेर विदेशमा आइटी सेवा दिने युवाहरूको संख्या बढ्दै गएको अवस्थामा सरकारले गरेको नीतिगत सुधारले ठूलो सहयोग पुगेको बताएका छन्।
नेपाली कांग्रेसको आयोजनामा बुधबारबाट सुरू भएको एसएमई सम्मेलन अन्तर्गत नवप्रवर्तन र उद्यमशीलताद्वारा आर्थिक प्रवर्द्धन शीर्षकको प्यानलमा उनले सरकारले कानुन संशोधन गरेर आइटी उद्यमका लागि जग बसाउने काम गरेको बताए।
सरकारले हालै जारी गरेको अध्यादेशबाट नेपाली आइटी कम्पनीले विदेशमा शाखा कार्यालय स्थापना, लगानी गर्ने सुविधा दिएको छ। त्यस्तै विदेशबाट आर्जित आम्दानीलाई सहज रूपमा ल्याउन तथा लगानी गर्न सहयोग गरेको छ।
पाण्डेले नेपाली युवाहरू आइटी उद्यममा क्रमशः केन्द्रित हुँदै गए पनि दक्षिण एसियाली राष्ट्रहरूको तुलनामा नेपाल निकै पछि रहेको बताए।
उनले अहिले करिब एक लाख युवा आवद्ध आइटी सेवाबाट वार्षिक ८०० मिलियन डलर विदेशी मुद्रा आर्जन गरेको बताए।
आगामी १० वर्षमा करिब आठ खर्ब नेपाली रूपैयाँ बराबरको विदेशी मुद्रा आर्जन गर्न तथा चार लाख बढी युवा आवद्ध हुन सक्ने आधार रहेको उनको तर्क थियो।
उनले अन्तर्राष्ट्रिय बजारमा नेपाली आइटी सेवा पुर्याउनको लागि सरकारको सहयोग आवश्यक रहेको बताए।
त्यस्तै, उनले आइटी ज्ञान भएको जनशक्ति उत्पादन गर्नको लागि स्कुल तहको पाठ्यक्रम परिवर्तन गर्नुपर्ने बताए।
