भूमि व्यवस्था, सहकारी तथा गरिबी निवारण मन्त्री बलराम अधिकारीले अपव्याख्या गरेर भूमि अध्यादेश पारित हुन नदिएको बताएका छन्।
नेपाल जग्गा तथा आवास विकास महासंघको तेस्रो स्थापना दिवसको अवसरमा आयोजित कार्यक्रममा मन्त्री अधिकारीले यस्तो बताएका हुन्।
'घरजग्गा व्यवसायलाई सहजीकरण गर्ने गरी अध्यादेश ल्याएका थियौं,' मन्त्री अधिकारीले भने, 'सम्बन्धित नै नभएको गिरिबन्धु टि–इस्टेटलाई जोडेर अध्यादेशको गलत व्याख्या गरियो।'
उक्त अध्यादेश प्रतिनिधि सभाले पारित गरेपनि राष्ट्रिय सभाले पारित नगरेपछि खारेज भएको हो। भूमि अध्यादेशलाई विधेयकको रूपमा ल्याउने सहमति भएको मन्त्री अधिकारीले जानकारी दिए।
अध्यादेश कार्यान्वयनमा आउन दुवै सभाले पारित गर्न पर्छ भने विधेयक प्रतिनिधि सभाले पारित गरे पुग्छ।
मन्त्री अधिकारीले घरजग्गा व्यवसायीलाई सरकार र जनताको सहयोगीको रूपमा काम गर्न पनि आग्रह गरेका छन्।
'घरजग्गा व्यवसायी भनेका विचौलीया हुने। आफ्नो फाइदाको लागि काम गर्छन् भन्ने छ,' उनले भने, 'आम मानिसलाई राम्रो सन्देश दिने गरी काम गर्नुहोस्।'
घरजग्गा व्यवसायलाई व्यवस्थित गर्न मन्त्रालय सधैं तत्पर रहेको मन्त्रालयका निमित्त गणेश प्रसाद भट्टले बताए।
उनले व्यवसायीलाई आवास मात्रै नभएर कृषि जग्गा पनि विकास गर्ने अवधारणा लिएर आउन आग्रह गरेका छन्।
'हामी तपाईंहरूसँग छलफल गर्न तयार छौं आउनुहोस्,' उनले भने।
महासंघका उपाध्यक्ष दिपक कुँवरले घरजग्गा व्यवसायलाई उद्योगको मान्यता दिन मन्त्रालयलाई आग्रह गरेका छन्।
'हामीले घरजग्गा व्यवसाय गरेर भुमाफियाको नाम पाएका छौं,' उनले भने, 'सरकाले यसलाई उद्योगको मान्यता दिएर सुविधा दिनपर्छ।'
महासंघका अध्यक्ष विष्णु प्रसाद घिमिरेले घरजग्गा व्यवसायलाई बढाउन नीतिगत सहयोग गर्नुपर्ने बताए।
