जमलस्थित विश्वज्योति मलमा चाडवाड लक्षित मेला सुरु भएको छ। बिहीबारदेखि सुरु भएको मेला २० गतेसम्म चल्ने छ।
यस अवधिमा सामान खरिद गर्नेले ५० प्रतिशतसम्मको छुट पाउने छन्। प्रवेश गर्ने हरेकले एउटा कुपन पाउने छन्। ति कुपनबाट गोलाप्रथा गरी साप्ताहिक रुपमा मोबाइल फोन, दैनिक रुपमा सपिङ भौचर तथा लञ्च कुपनका साथै अन्य आकर्षक उपहारहरु प्राप्त गर्न सक्ने मेला संयोजक हिरामणि तिमल्सिनाले जानकारी दिए।
त्यसै गरी लाइभ म्युजिक, फेशनशो तथा गेम शो मेलाकोे आकर्षणका रुपमा रहने छन्। खाने प्रतियोगिता समेत सञ्चालन हुने मेलामा आईसक्रिम, मम तथा बर्गर खाने प्रतियोगिता सञ्चालन हुनेछ।
निशुल्क फेस पेन्टिङ, जादु प्रदर्शन तथा हास्य व्यङ्ग्य प्रदर्शनी समेत हुने मेलामा पुरानो मोबाइलसँग नयाँ साट्न पाइने संयोजक तिमल्सिनाले जानकारी दिए।
