नेपाल अन्तर्राष्ट्रिय व्यापार मेला २०२५ को दशौं संस्करण आज (बिहीबार)देखि काठमाडौंको भृकुटीमण्डपमा सुरू भएको छ।
नेपाल उद्योग वाणिज्य महासंघको आयोजना र ललितपुर उद्योग वाणिज्य संघ तथा घरेलु तथा साना उद्योग महासंघको सहआयोजनामा मेला वैशाख २९ गतेसम्म सञ्चालन हुनेछ।
उद्घाटन कार्यक्रममा उद्योग, वाणिज्य तथा आपूर्ति मन्त्री दामोदर भण्डारीले निजी क्षेत्रको मागअनुसार नीतिगत सुधारमा सरकारले काम गरिरहेको जानकारी दिए।
उनले नेपाली वस्तुको उत्पादन र उत्पादकत्व बढाएर निर्यात प्रवर्द्धनमा ध्यान दिन व्यवसायीलाई आग्रह गरे।
मन्त्री भण्डारीले निजी क्षेत्रको भूमिका मुलुकको अर्थतन्त्रमा महत्त्वपूर्ण रहेको बताए।
उनले सरकार औद्योगिक विकास, स्वदेशी उत्पादनको बजारीकरण र निर्यात प्रवर्द्धनका लागि नीतिगत सुधार र सहजीकरणमा जुटिरहेको उल्लेख गरे।
'रुग्ण उद्योगको पुनरुत्थान, नयाँ औद्योगिक सम्भावनाको पहिचान र लगानीमैत्री वातावरण निर्माणमा सरकार अग्रसर छ,' उनले भने।
उनले संसदमा प्रस्तुत नीति तथा कार्यक्रममा पनि औद्योगिक विकास र निजी क्षेत्र प्रवर्द्धनलाई प्राथमिकता दिइएको बताए।
मेलाबाट नेपाली वस्तुको गुणस्तर र मौलिकता विश्व बजारमा स्थापित गर्न सहयोग पुग्ने विश्वास उनले व्यक्त गरे।
कार्यक्रममा महासंघका वरिष्ठ उपाध्यक्ष अञ्जन श्रेष्ठले मेला नेपाली उत्पादनको अन्तर्राष्ट्रिय बजार प्रवर्द्धनमा सहयोगी हुने बताए।
उनले मुलुकको अर्थतन्त्र जटिल मोडमा रहेका बेला बजारमा सकारात्मक सन्देश दिन मेला आयोजना गरिएको जानकारी दिए।
'मेलाले स्वदेशी तथा विदेशी व्यवसायीबीच व्यापारिक सम्बन्ध विस्तार, लगानी आकर्षण र रोजगारी सिर्जनामा योगदान दिने आशा गरेका छौं,' उनले भने।
श्रेष्ठले नेपालमा अन्तर्राष्ट्रियस्तरको व्यापार मेला आयोजना गर्न उपयुक्त स्थल अभाव रहेको बताए।
उनले व्यवस्थित मेला तथा प्रदर्शनी स्थल निर्माणमा सरकार र सरोकारवालाको ध्यान जानु पर्नेमा जोड दिए।
व्यापार तथा निकासी प्रवर्द्धन केन्द्रका कार्यकारी निर्देशक शरद विक्रम राणाले नेपाली वस्तु निर्यात गर्न क्षमता बढाउनुपर्ने धारणा राखे।
मेलामा नेपाल, चीन र बंगलादेशका गरी १२० बढी स्टल रहेको जानकारी दिए।
त्यस्तै विदेशी व्यापारिक प्रतिनिधिसँग भेटघाट र छलफलबाट द्विपक्षीय व्यापार र लगानीका अवसरबारे समेत कुराकानी हुने बताइएको छ।
