अमेरिकाको टेक्सस राज्यको राजधानी अस्टिनमा यही मे १५ मा पहिलो पटक बुद्ध दिवस (वेसाक दिवस) मनाइएको छ।
नेपालिज बुद्धिस्ट एसोसिएसन, टेक्सास (एनबिएटी) को आयोजना तथा हुओङ दाओ विपश्यना भावना केन्द्र र टेक्सासभरिका अन्य बौद्ध समुदायहरूको सहकार्यमा यो कार्यक्रम सम्पन्न भएको हो।
त्यसै दिन बिहान टेक्सास राज्यको ८९औं विधान सभाको प्रतिनिधि सभाले वेसाक दिवसलाई पवित्र दिवसका रूपमा मान्यता दिने प्रस्ताव पारित गरेको थियो।
संसारभरि बुद्धको जन्म, बुद्धत्व प्राप्ति र महापरिनिर्वाण (मृत्यु) को सम्झना गर्दै वेसाक दिवस मनाउने चलन छ।
बुद्धको जन्म इ.पू. ५६३ मा लुम्बिनीमा भएको हो। वेसाक दिवस परम्परागत रूपमा मे पूर्णिमाका दिन मनाइन्छ र विश्वभरका करोडौं बौद्धले यो पर्व महिनाभर मनाउँछन्।
'यो उत्सव केवल ऐतिहासिक होइन, यसको सन्देश पनि अत्यन्त शक्तिशाली छ,' एनबिएटीका महासचिव तथा कार्यक्रम सञ्चालक डा. नीरज बज्राचार्यले भने, 'हामी बुद्धप्रति कृतज्ञता व्यक्त गर्न र शान्ति तथा एकताका मूल्य पुनः पुष्टि गर्न यहाँ भेला भएका हौं।'
११ राष्ट्रका ५९ जना भन्दा बढी भिक्षुहरूको सहभागिताले यसलाई साँच्चिकै अन्तर्राष्ट्रिय वेसाक दिवस बनाएको उनले बताए।
कार्यक्रमको सुरूआत धार्मिक खण्डबाट भएको थियो जसको नेतृत्व भिक्षु पन्नाकाराले गरे। त्यसपछि कार्यक्रमको सामान्य खण्डमा सांस्कृतिक प्रस्तुतिहरू, प्रमुख वक्ताहरूका सम्बोधन र अन्तर-धार्मिक एकताको अभिव्यक्ति समावेश थियो।
सुन्दर रूपमा सजिएको मञ्चमा बुद्धको जन्म, बुद्धत्व प्राप्ति र महापरिनिर्वाणको प्रतीक बुद्ध मूर्तिहरू श्रद्धा र सम्मानका साथ सजाइएको थियो।
कार्यक्रमको धार्मिक खण्ड भियतनामी र नेपाली महिलाहरूले परम्परागत पोसाकमा बुद्धलाई फूल अर्पण गर्दै सुरू भएको थियो। त्यसपछि थेरवाद, महायान र वज्रयान परम्पराका वरिष्ठतम भिक्षुहरूले वेसाक दिवसको सन्देश प्रस्तुत गरे जसले विश्व बौद्ध समुदायभित्रको एकता र विविधतालाई सम्मान जनाएको एनबिएटीले जनाएको छ।
एनबिएटीका अनुसार अमेरिका भर निर्माणाधीन प्रमुख बौद्ध पूर्वाधार परियोजनाहरूको पहिचान पनि कार्यक्रममा गरिएको थियो। तीमध्ये टेक्सासको फोर्ट वर्थस्थित हुओङ दाओ मन्दिरमा निर्माणाधीन धम्मचेतिया परियोजन उल्लेखनीय छ। दुई सय मिलियन डलरको यो योजनाले ८४० स्तूप निर्माण गर्ने लक्ष्य राखेको छ।
कार्यक्रममा भिक्षु पन्नाकाराले यस ऐतिहासिक परियोजनाको आध्यात्मिक र सांस्कृतिक महत्त्वबारे मन्तव्य दिए। परियोजनाको थ्री-डी मोडल पनि प्रदर्शन गरिएको थियो।
डा. बज्राचार्यले टेक्सासको यूलेसमा निर्माण हुने स्वयम्भू स्तूपको पनि उल्लेख गरे।
'हामी टेक्सास राज्यका सांसद सलमान भोजानीप्रति विशेष आभार प्रकट गर्न चाहन्छौं,' डा. बज्राचार्यले भने।
भोजानीले ८९ औं टेक्सास विधान सभाको प्रतिनिधि सभाबाट वेसाक दिवसको मान्यताको प्रस्ताव पारित गराउन महत्वपूर्ण भूमिका खेलेका थिए।
एनबिएटी अध्यक्ष मकर बज्राचार्यले बुद्धको जन्मभूमि नेपालमा आफू जन्मिन पाएकोमा गर्व व्यक्त गर्दै सबैलाई बुद्धको जन्मस्थल लुम्बिनी भ्रमण गर्न आमन्त्रण गरे।
सांसद सलमान भोजानी बाहेक सांसद सुलेमान ललानी, सांसद वो र अन्य विशिष्ट अतिथिहरूले पनि यस अवसरमा बधाइ र कृतज्ञताको मन्तव्य दिए।
कार्यक्रमको सभापतित्व ध्यान आचार्य मयौक ओले गरेका थिए।
