माडिचौरको माघे मेलैमा...

सुरेन्द्र राना

माडिचौर, रोल्पा, माघ ३

२०६२ को शान्ति प्रतिकृयापछि देशमा जारी दश वर्ष लो द्वन्द्वको अन्त्य भयो। माओवादी सशस्त्र संघर्षको बेला रोल्पा र आसपासका जिल्लामा मेला तथा पर्वहरू प्रायः शून्य हुन्थ्यो।

देशमा शान्ति छाएसँगै स्थानीय ठाउँमा बिभिन्न मेला महोत्सवको आयोजना हुन थाले। यसै क्रममा प्रदेश नं ५ अन्तर्गत रोल्पा सदरमुकाम लिबाङबाट ५ किमि पश्चिमा पर्ने रोल्पा नगरपालिका-६ माडिचौरमा मगरहरूले आफ्नो महान चाड ‘माघे महोत्सव’ भब्य तरिकाले मनाए।

‘मौलिक कला संस्कृतिको संरक्षण, खेलकुद विकास र समृद्ध रोल्पा’ को नारासहित माघे संक्रान्तिको अवसरमा खेलकुद प्रतियोगितासहित विभिन्न सांस्कृतिक कार्यक्रमसमेत आयोजना गरिएको थियो।

मेलामा रोल्पा नगरपालिकाका हरेक वडाबाट स्थानीयहरू आफ्नै मौलिक भेषभुषा तथा गरगहना सजिएर मेला भर्न आएका थिए।

नेपाल राष्ट्रिय मावी कोटगाउँ र बाल कल्याण मावीका विधार्थीले विभिन्न नाँचकला प्रदर्शन गरेका थिए।

महोत्सवमा फुटबल र भलिवल प्रतियोगिताको उद्घाटन जलश्रोत तथा उर्जा मन्त्री वर्षमान पुनले गरे। पुनले देश संघीयतामा गईसकेकोले देशका बिभिन्न जात जातिको कला, संस्कृति र पर्व देशका गहना भएको भन्दै यसलाई सरकारले संरक्षण र सम्बर्धन गर्ने दाबी गरे।

त्यसै गरि प्रदेश नं ५ का सामाजिक विकास मन्त्रीले नेपालमा विविध सांस्कृतिक मेला पर्वले आपासमा मेलमिलाप र भाईचारा राख्न मद्दत पुर्‍याएको विचार राखे।

रोल्पा नगरपालिका प्रमुख पूर्ण केसीले स्थानीय मगर जातिको कला संस्कृति, परम्मपरा प्रबर्धन गर्ने उद्धेश्वले माघे मेलाको अवसरमा माघे मेला तथा खेलकुद महोत्सव-२०७५ आयोजना गरिएको स्पष्ट पारे।

महोत्सवमा बिभिन्न झाँकिसहित सारङ्गी नाच, दमाहा ताल नाच, पैसेरू नाँचसमेत प्रदर्शन गरिएको थियो।

हेर्नुहोस् तस्बिरहरू