अभिनेत्री साम्राज्ञी राज्यलक्ष्मी शाह अभिनीत म्युजिक भिडिओ 'मालती' सार्वजनिक गरिएको छ।
मंगलबार युट्युबमा सार्वजनिक यो नेपाली म्युजिक भिडिओ इतिहासमा सबैभन्दा ठूलो लगानीको भिडिओ भएको निर्माण पक्षको दाबी छ।
दसैंअघि थाइल्याण्डमा छायांकन गरिएको भिडिओमा ६० लाख रूपैयाँ बढी लगानी भएको निर्देशक सञ्जय न्यौपानेले बताएका छन्।
भिडिओको अभिनेत्री साम्राज्ञी र विशाल खरेलले अभिनय गरेका छन्। एक साताभन्दा बढी समय लगाएर छायांकन गरिएको बताइएको छ।
थाइल्याण्डका मोडलहरुलाई समेत कोरसका रूपमा भिडिओमा प्रयोग गरिएको निर्माण पक्षले जनाएको छ।
गीतमा सुरज विक्रम थापा (बुलेट फ्लो) र डिवी यो म्याजेस्टीको शब्द तथा संगीत छ। ममता गुरूङ, बुलेट फ्लो र डिवी यो म्याजेस्टीले स्वर दिएका छन्।
सौरभ लामाको छायांकन रहेको म्युजिक भिडिओलाई कमल खतिवडा र निर्देशक न्यौपानेले निर्माण गरेका हुन्। लोकेन्द्र सुब्बाले भिडिओको सम्पादन गरेका हुन्।
भिडिओले २४ घण्टामा युट्युबमा १८ लाखभन्दा बढी भ्युज पाएको छ।
