रात छिप्पिँदै थियो। सिमसिम पानी पर्न थाल्यो। दर्शकले चिच्याएर आफ्ना प्रिय गायक राजु लामालाई बोलाउन थाले– ‘छिटो आउनु न, पानी परिसक्यो।’
पोखरामा मंगलबार र बुधबार दुई दिन ‘फुल मुन दसैं फेष्ट’ शीर्षकमा सांगीतिक कार्यक्रम आयोजना गरिएको थियो। सोही कार्यक्रममा निम्त्याइएका थिए, मंगोलियन हार्ट, पूर्ण राई एण्ड दाजुभाइहरू, रकहेड्स, टुकी र जेम्सी।
लाइभ कन्सर्टको पहिलो दिन रक हेड व्याण्डले आफ्नो सांगीतिक प्रस्तुति राखेपछि मंगोलियन हार्टको पालो आउँदै थियो। लामालाई दर्शकले बोलाउन थालेपछि काउण्ट डाउन सुरू भयो। उनी नेपालको राष्ट्रिय झण्डा बोकेर निस्किए।
स्टेजमा उत्रनुअघि नै लामाले गीत गाउन सुरू गरे। राष्ट्रिय झण्डा बोकेर ‘मेरो देश मलाई लाग्छ प्यारो’ बोलको गीत गाउँदै उनी स्टेजमा पुगे। दर्शकले हुटिङ गरेर स्वागत गरे। अनि लामाको स्वरमा आफ्नो स्वर मिलाए।
जेनजी आन्दोलनपश्चात पोखरामा आयोजित पहिलो लाइभ कन्सर्ट थियो यो। व्यवसायी र आम मानिसमा अनिश्चय र त्रास बढिरहेका बेला कन्सर्ट आयोजना गर्नु चानचुने कुरा थिएन। कन्सर्टमा गएर गीत गाउनु पनि उत्तिकै जोखिम थियो।
‘जेनजी आन्दोलनपछि पहिलो कन्सर्ट यो हो,’ गायक लामाले स्टेजबाट भने, ‘उहाँहरूको योगदानलाई नबिर्सिन हामी सबै नेपाली भएर देशलाई माया गरौं, हुन्छ हजुर।’
गीतका बिचमा केही सार्वजनिक हितका सन्देशहरू जारी गर्दै लामाले कन्सर्ट सांगीतिक माहौल तताए।
उनले ‘तिमीलाई देखेर हिमाल हासेको, ‘पर्खाइमा’, ‘बादल पारीको देशबाट’ जस्ता सुपरहिट गीत गाउँदा दर्शकले पनि उनको स्वरमा स्वर मिलाए। कसैले कम्मर मर्काउँदै संगीतको आनन्द उठाए।
अन्यौल र त्रासका बावजुद ब्लक एक्स इन्टरटेनमेन्ट प्रालिले आयोजना गरेको लाइभ कन्सर्टमा अरूबेला भन्दा कम दर्शकको उपस्थिति थियो।
दर्शकको उपस्थिति तुलनात्मक रूपमा कम भए पनि पोखराले मंगोलियन हार्टलाई गरेको माया कम नभएको लामाले बताए। विगत २५ वर्षदेखि गीत गाउन पोखरा आउँदा कहिल्यै ऊर्जा कम नपाएको उनले बताए।
‘पोखरा र पोखरेलीको माया हाम्रो सांगीतिक यात्रामा एकदम महत्वपूर्ण छ। २०–२५ वर्षदेखि हामी पोखरा आइराखेका छौं,’ उनले भने, ‘जहिले पनि पोखरा आउँदा दशौं हजारमा बजाए पनि बिसौं हजारमा बजाए पनि एक हजार जना मान्छेका अगाडि बजाए पनि पाँच सय जनाको अगाडि बजाए पनि इनर्जी लेभल घटेको छैन।’
दोस्रो दिनको कन्सर्टमा जेम्सीले र्याप गीत गाए।
उनले आफ्नो सांगीतिक प्रस्तुति राखेपछि धरानबाट उदाएका पूर्ण राई एण्ड दाजुभाइहरू ब्याण्डको पालो आयो। उनले पनि आफ्नो लोकप्रिय गीतहरू प्रस्तुत गरेर दर्शक नचाउन सफल भए।
जेनजी आन्दोलनका क्रममा काठमाडौंपछि ठूलो क्षति पोखरामा भएको थियो। पोखराका सबै सरकारी कार्यालय र केही निजी तथा व्यावसायिक प्रतिष्ठानमा पनि प्रदर्शनकारीले आक्रमण गरेका थिए। लेकसाइडका केही होटल र व्यवसाय प्रदर्शनकारीले जलाएका थिए। उक्त दृश्य देखेका पर्यटन व्यवसायी अझै त्रासमै छन्।
जेनजी आन्दोलन पश्चात समाजमा देखिएको अन्यौल र त्रासबाट पोखरालाई मुक्त गर्न कन्सर्टको आयोजना गरेको ब्लक एक्स इन्टरटेनमेन्ट प्रालिका व्यवस्थापक धीरज गुरुङले बताए। पर्यटकीय राजधानी घोषणा भएको सहर पर्यटकका लागि सुरक्षित रहेको सन्देश दिनु आफ्नो उद्देश्य भएको उनले बताए।
‘पोखरा सुरक्षित छ भनेर सन्देश दिन कन्सर्ट आयोजना गरेका हौं,’ उनले भने, ‘आर्थिक रूपमा हामीलाई हानि भयो होला, तर सन्देश दिन सफल भएका छौं।’
-1746009348.jpg)
