चलचित्र विकास बोर्डले बक्स अफिस प्रणालीको कार्यान्वयनलाई प्रभावकारी बनाउन देशभरका विभिन्न फिल्म हलहरूमा अनुगमन गरेको छ।
बोर्डले साउन २९ देखि भदौ ४ गतेसम्म काठमाडौं उपत्यका तथा बाहिरका विभिन्न जिल्लामा बक्स अफिस प्रणालीको अनुगमन गरेको हो।
बोर्ड सदस्य गणेश सुबेदीको नेतृत्वमा २२ जनाको टोलीले गोरखा, तनहुँ, कास्की, रूपन्देही, नवलपरासी, पाल्पा लगायतका जिल्लाका गरी ६० वटा चलचित्र हलको निरीक्षण गरेको बोर्डले जनाएको छ।
अनुगमनका क्रममा अधिकांश हलले बक्स अफिस प्रणाली अनुसार नै टिकट बिक्री गरिरहेको पाइएको थियो। यद्यपि, दुईवटा सिंगल थिएटरले ‘सिस्टम बिग्रिएको’ भन्दै म्यानुअल टिकट बिक्री गरिरहेको फेला परेको छ।
बोर्डलाई पूर्व जानकारी नदिई म्यानुअल टिकट बिक्री गरेको पाइएकाले ती दुई हललाई नियमानुसार दण्ड-जरिवाना गरिने बोर्डले जनाएको छ।
यसअघि पनि बोर्डले नियमन तथा अनुगमनलाई निरन्तरता दिँदै आएको छ। गत मंसिरमा १४ जिल्लामा गरिएको अनुगमनका क्रममा अवैधानिक रूपमा सञ्चालन भइरहेका ९ वटा हल कारबाहीमा परेका थिए। साथै, ३ वटा हललाई जिल्ला प्रशासन कार्यालयको समन्वयमा ताल्चा लगाइएको थियो।
बोर्डका अनुसार नियमित अनुगमनले चलचित्रघरहरूलाई नियमको दायरामा ल्याउन, चलचित्र विकास शुल्क समयमै बुझाउन र बक्स अफिस प्रणालीको कार्यान्वयन प्रभावकारी हुने देखिएको छ।
-1746009348.jpg)
