फिल्म 'कश्यप' मा टिकटकर तथा कन्टेन्ट क्रियटर आभा ढुंगाना अभिनेत्रीका रूपमा अनुबन्धित भएकी छन्।
निर्देशक दिनेश जी खड्काले कथाको मागअनुसार नयाँ अनुहारलाई अवसर दिन खोजिएको बताए। उनले आभाको प्रतिभालाई ध्यानमा राखी स्क्रिन–टेस्ट गरेरै फाइनल गरिएको जानकारी दिए।
फिल्ममा जोडिएसँगै आभाले एक्सन दृश्यको विशेष प्रशिक्षण लिइरहेकी छिन्।
उनी भन्छिन् 'फिल्मको कथा, गीत–संगीत र सम्पूर्ण पक्षलाई उत्कृष्ट बनाउन निर्माण टोलीले अत्यन्तै मेहनत गरिरहेको छ। मलाई विश्वास छ, ‘कश्यप’ ले दर्शकहरूलाई मनोरञ्जन मात्र होइन, राम्रो सन्देश पनि दिनेछ।'
यही फिल्ममार्फत बालकलाकार रिद्धी खत्रीले पनि नेपाली रजतपटमा डेब्यू गर्न लागेकी छन्। अडिसनमार्फत चयन भएकी रिद्धीले धेरै प्रतिस्पर्धीलाई पछि पार्दै ‘कश्यप’ को महत्वपूर्ण पात्रमा अवसर पाएको निर्माण पक्षले जनाएको छ।
यसअघि निर्माण पक्षले एक्सन अभिनेता सविन श्रेष्ठलाई फिचर गरेर फर्स्टलुक पोस्टर सार्वजनिक गरिसकेको छ।
'कश्यप' एक्सन, प्रेम र म्युजिकल रूपमा मनोरञ्जनात्मक फिल्म हुने बताइएको छ। चाँडै नै फिल्मको छायाँकन थालनी हुने निर्माणपक्षको भनाइ छ।
-1746009348.jpg)
