भारतका चर्चित हास्य कलाकार तथा अभिनेता कपिल शर्माले क्यानडामा केही दिनअघि मात्रै खोलेको क्याफेमा गोली प्रहार भएको छ।
क्यानडाको ब्रिटिस कोलम्बियास्थित सुरे र डेल्टा सहरको सिमानामा पर्ने आवासीय क्षेत्रमा रहेको 'क्याप्स क्याफे' मा बिहीबार अन्धाधुन्ध गोली चलेको हो।
गोली प्रहारबाट क्याफेको झ्यालका सिसा फुटेका छन्। मानवीय क्षति भने नभएको भारतीय अनलाइन हिन्दुस्तान टाइम्सले जनाएको छ।
घटनास्थल पुगेका न्युजडर्बीका संस्थापक समीर कौशललाई उद्धृत गर्दै क्याफेमा धेरै गोली प्रहार भएको हिन्दुस्तान टाइम्सले लेखेको छ। कौशल त्यहाँ पुग्दा सुरे पुलिसका धेरै गाडीहरू क्याफेअगाडि तैनाथ थियो।
घटना राति १:५० बजे भएको थियो।
सुरे प्रहरीले विज्ञप्तिमार्फत अनुसन्धान जारी रहेको जनाएको छ।
'बिहीबार, जुलाई १० का दिन राति १:५० बजे १२० स्ट्रिटको ८४०० ब्लकमा रहेको व्यवसायमा गोली चलेको खबरपछि प्रहरी खटाइएको छ,' विज्ञप्तिमा भनिएको छ।
प्रहरीले व्यक्ति भन्दा व्यवसाय लक्षित आक्रमण हुनसक्ने बताएको छ।
'प्रहरी पुग्दा क्याफेमा कामदारहरू उपस्थित रहेको र व्यवसाय लक्षित गरी गोली चलाइएको र सम्पत्तिमा क्षति पुगेको पुष्टि भएको थियो,' प्रहरीले भनेको छ।
घटनामा त्यहाँ उपस्थित मानिसहरू कोही पनि घाइते नभएको पुष्टि भएको छ।
उक्त क्याफे रहेको भवन आवासीय अपार्टमेन्ट हो। त्यस वरपर पनि आवासीय भवनहरू छन्।
त्यहाँ कपिल शर्माले जुलाइको पहिलो सातातिर क्याफे उद्घाटन गरेका थिए।
घटनापछि सामाजिक सञ्जालमा रातको समयमा क्याफेमा गोली चलाइएको देखिने एक अपुष्ट भिडियो भाइरल भएको छ।
साथै क्यानडा सरकारले आतंकवादी संगठनको सूचीमा राखेको बब्बर खालसा इन्टरनेशनल (बिकेआई)मा आबद्ध हरजित सिंह लड्डी र तुफान सिंहले हमलाको जिम्मेवरी लिएको दाबी गरिएको पोस्टहरू पनि फैलिएको भनेर हिन्दुस्तान टाइम्सले जनाएको छ।
त्यस्ता पोस्टहरूमा कपिल शर्मा शोमा निहङ्ग समुदायको भेषभूषा र व्यवहारबारे गरिएको हास्य टिप्पणीले धार्मिक भावनामा आहत भएको जनाइएको छ। यद्यपि यी दाबी र सामाजिक सञ्जालका पोस्टहरूको सत्यता पुष्टि भइसकेको छैन।
प्रहरीले गोली चलाउनेहरू को थिए भन्ने पहिचान गर्न सकेको छैन। ती पोस्ट लगायत अरू कोणबाट घटनामा संलग्नहरूको खोजी भइरहेको त्यहाँको प्रहरीले जनाएको छ।
क्यानडाको लोअर म्याइनल्याण्ड क्षेत्रमा हालैका समययता व्यवसायीहरूलाई धम्की दिँदै अपराधिक गिरोहहरूले गोली प्रहार गर्ने घटना बढेको भनेर हिन्दुस्तान टाइम्सले लेखेको छ।
जुलाई ३ मा क्यानाडेली रोयल माउन्टेड प्रहरीले फिरौतीसँग सम्बन्धित हिंसामा संलग्न दुई व्यक्तिलाई पक्राउ गरेको थियो।
यसअघि जुन ११ मा छिमेकी शहर अबोट्सफोर्डमा व्यवसायी सतविन्दर शर्माको गोली हानी हत्या गरिएको थियो।
सुरे शहरका लक्ष्मी नारायण मन्दिरका अध्यक्ष सतीशकुमारका व्यवसायहरू पनि यस वर्ष पटक–पटक आक्रमणमा परेका थिए।
-1746009348.jpg)
