नेपाली टेलिचलचित्र 'मनको बाँध' मा जापानी अभिनेत्री माहोले अभिनय गरेकी छन्।
विश्वप्रसिद्ध स्ट्रिमिङ प्लेटफर्म नेटफ्लिक्सको 'अफलाइन लभ' मा अभिनय गरेकी उनले नेपाली टेलिचलचित्रमा काम थालेकी हुन्। जापानी अभिनेत्री माहोको 'अफलाइन लभ' सिरिज पछिल्लो समय दर्शकहरूको प्रशंसाको विषय बनेको छ।
विश्वकै प्रतिष्ठित फेसन प्लेटफर्म पेरिस फेसन विकमा सहभागी रहेकी माहो मोडलिङ क्षेत्रमा समेत उतिकै सक्रिय छिन्। फेसन र डिजिटल दुनियाँका ख्यातिप्राप्त उनको अभिनय रहेको 'मनको बाँध' वैशाख ६ गते शनिबार युट्युब च्यानल फोकस पिक्चर्समार्फत देख्न सकिनेछ। नेपाली टेलिचलचित्र 'मनको बाँध' को नयाँ अंक बेलुकी ७ बजे प्रसारण हुँदैछ।
'कोठा भाडामा बस्ने सामान्य परिवारको कथा वस्तुमा तयार गरिएको नेपाली टेलिचलचित्रमा अन्तर्राष्ट्रिय ख्यातिप्राप्त कलाकारको अभिनय जोड्न पाउनु खुसीको विषय हो,' निर्देशक प्रदीप खड्गीले भने।
नेपाली रंगमन्चमा विदेशी कलाकारहरूको डेब्यू गराएर टेलिचलचित्रमा पृथक गर्न खोजिएको निर्देशक खड्गीको भनाइ छ। उनले यसअघि नेपाली ऐतिहासिक फिल्म 'कीर्तिपुर द लिजेन्ड अफ कीर्तिलक्ष्मी', नेपाली थ्रिलर फिल्म 'अपीच्य', बहुभाषी फिल्म 'हिमआँधी' लगायतका ठूला पर्दाका फिल्म निर्देशन गरिसकेका छन्।
