पूर्व मिस नेपाल उषा खड्गीले फिल्ममा डेब्यु गरेकी छन्। सन् २००० मा मिस नेपालको ताज जितेकी उनले त्यसको २५ वर्षपछि फिल्ममा अभिनय गरेकी हुन्।
उनको पहिलो फिल्म 'नरसिंहाः अवतार' जेठको ९ गतेदेखि प्रदर्शनमा आउने तयारीमा छ। यो फिल्ममा उषाको भूमिका के होला भन्ने कौतुहलता दर्शकमा छ। यसैबीच निर्माणपक्षले उषाको फर्स्टलुक सार्वजनिक गरेको छ। सार्वजनिक पोष्टरमा उषा मुस्कुराएकी छिन्। उनको पछाडि नरसिंहाको ठूलो चित्र देख्न सकिन्छ।
यो फिल्मलाई लिएर आफू निकै उत्साहित रहेको उषाले बताएकी छिन्। यो फिल्ममा राजेश हमाल, राज कटुवाल, सनिशा भट्टराई, नीति शाह, सरोज खनाल लगायतको अभिनय छ।
उषाको फर्स्टलुक आउँदै गर्दा उनी फिल्ममा कसको जोडीका रूपमा देखिन लागेकी छन् भन्ने चासो समेत छ। यद्यपि, निर्माणपक्षले यसबारे केही खुलाएको छैन।
उसो त उषाले अभिनेता राजेश हमालसँग म्युजिक भिडिओमा काम गरिसकेकी छिन्। तर, फिल्ममा पर्दा शेयर गर्न पाउँदा निकै खुसी भएको र आफ्नो कामलाई दर्शकले कसरी लिनुहुन्छ भन्ने कुराले कौतुहलता बढाएको उषाको भनाइ छ।
'नरसिंहाः अवतार' दिवाकर भट्टराईको लेखन तथा निर्देशनमा बनेको हो। फिल्ममा दीपक ढकाल, नरेन्द्र महर्जन, ध्रुव न्यौपाने र नेम महर्जनको लगानी छ।
