विराज खड्काको निर्देशनमा निर्माण हुन लागेको फिल्म 'सत्यवीर' मा अभिनेता प्रकाश शाह अनुबन्ध भएका छन्।
'लभ स्टेशन, साङ्लो' र पछिल्लो रिलिज फिल्म 'रावायण' का प्रमुख खलपात्र शाहलाई सोमबार अनुबन्ध गरिएको निर्माण टिमले जनाएको छ।
शाह फिल्मको प्रमुख कलाकारमा अनुबन्ध भएको निर्माण कम्पनी गडरेज पिक्चर्स प्रालीले जनाएको छ। फिल्ममा शाहले भूमिकाबारे भने निर्माण टिमले खुलाएको छैन। निर्माण टिमले सार्वजनिक गरेको पोस्टरमा शाहलाई 'एंग्री' लुक्समा देख्न सकिन्छ।
यसअघि अभिनेता प्रदीप चौधरीको फर्स्टलुक सार्वजनिक गरेको निर्माण टिमले फिल्मको पूर्ण कास्टिङ लाइनअप सार्वजनिक गरेको छैन।
'सत्यवीर' को निर्मातामा आदेश सुब्बा छन्। फिल्म आगामी डिसेम्बरबाट फ्लोरमा जानेछ। एक दशक लामो समयदेखि भिएफएक्स तथा एनिमेसनमा सक्रिय विराज खड्काले ठूलो पर्दाको लागि निर्देशनमा यो डेब्यु फिल्म रहनेछ।
काठमाडौंमा भिएफएक्स र एनिमेसन स्कुल सञ्चालन गरेर सय बढी विद्यार्थीलाई खड्काले प्रशिक्षण दिइरहेका छन्। २१ औं शताब्दीको टेक्नोलोजीको समयमा नेपाली फिल्मलाई उच्च कोटीमा पुर्याउने उद्देश्यसहित फिल्म निर्देशनमा जुटेको खड्काले बताए। उनले यसअघि एक दर्जन सर्ट फिल्म र म्युजिक भिडिओ समेत निर्देशन गरेका छन्।
खड्काले यो फिल्ममा ४० प्रतिशत दृश्य भिएफएक्स रहने बताए। बाँकी ६० प्रतिशत दृश्य काठमाडौं र चितवन लगायत तराई क्षेत्रमा छायांकन गरिनेछ। 'सत्यवीर' को कथा प्रदीप चौधरीको हो। साढे २ करोडको लागतमा निर्माण हुने बताइएको फिल्ममा परिचित कलाकारहरू नै प्रमुख अभिनयमा रहने निर्माता सुब्बाले बताए।
शाहसँगै कलाकारमा प्रदीप चौधरी र द्वन्द्व निर्देशकमा हिमाल केसी बाहेक निर्माण कम्पनीले फिल्मको 'कास्ट एण्ड क्रु' सार्वजनिक गरेको छैन्। फिल्म एक्सन थ्रीलर जनरामा बन्न लागेको हो।
