दिनेश राउतको निर्देशन रहेको फिल्म 'पुजार सार्की' रिलिज अगावै केही दर्शकलाई देखाइएको छ। काठमाडौंका विभिन्न स्थानहरूमा १ सय बढी दर्शकमाझ गरिएको सर्भेपछि फिल्म देखाइएको निर्देशक राउतले बताए।
मंगलबार बेलुका सिडिसी सिनेमाजमा १ सय बढी दर्शकले यो फिल्म हेरेका छन्। त्यसक्रममा 'पुजार सार्की' का कलाकारहरूले पनि फिल्म हेरेका थिए।
दर्शक सर्भेका क्रममा फिल्मलाई एकदमै माया गर्ने, 'पुजार सार्की' हेर्न प्रतीक्षा गरिरहेको लगायतको प्रतिक्रिया दिएकालाई फिल्म देखाइएको हो।
फिल्मप्रति दर्शकको दृष्टिकोण बुझ्नु, आफ्नो फिल्मबारे दर्शकले बुझेको कुरालाई थाहा पाउनु, फिल्म हेरेका दर्शकको प्रतिक्रियाबाट आएका सुझावहरूलाई मनन गरेर दर्शकको चाहना अनुरूप सुधार गर्ने उद्देश्यले रिलिजअगाडि फिल्म देखाएको निर्देशक राउतले बताए।
फिल्म हेरेका दर्शकले सकारात्मक प्रतिक्रिया दिएका छन्। विषय, कलाकारहरूको अभिनय तथा निर्देशकीय पाटोको दर्शकले प्रशंसा गरेका थिए।
बिहीबारदेखि प्रदर्शनमा आउने 'पुजार सार्की' मा आर्यन सिग्देल, प्रदीप खड्का, पल शाह, अञ्जना बराइली, परीक्षा लिम्बू लगायतका कलाकारहरूको अभिनय छ।
विकास सुवेदीको लेखन रहेको फिल्मको निर्माता सुवास भुसाल हुन्।
फिल्मलाई नेपालमा आरआर फिल्मस् र अन्तर्राष्ट्रिय बजारमा एमएसएम इन्टरटेन्मेन्टले वितरण गर्दैछ।
1623773574-1718183469.jpeg)
