एएफसी एसियन कप छनोटअन्तर्गत भियतनामविरूद्धको दुई खेलका लागि नेपाली राष्ट्रिय फुटबल टोली घोषणा गरिएको छ।
टोलीमा अघिल्लो महिना बंगलादेशविरूद्ध मैत्रीपूर्ण खेल खेलेको टोलीमा नरहेका पाँच खेलाडीले पुनरागमन गरेका छन्।
बंगलादेशसँग खेल्दा नेपालको यू-२३ टोलीबाट एसियन कप छनोट खेल्न गएका कृतिश छुन्छु, सुमित महर्जन र आयुष घलान राष्ट्रिय टोलीमा फर्किएका छन् भने चोट मुक्त हुँदै सनिश श्रेष्ठ र विमल पाण्डेले पुनरागमन गरेका हुन्।
हुन त पाँचै खेलाडीलाई प्रशिक्षक म्याट रसले प्रारम्भिक टोलीमा बोलाएका थिए। प्रारम्भिक चरणमा रसले ३३ खेलाडीलाई बोलाएका थिए।
प्रारम्भिक टोलीबाट टेकेन्द्र थापा, आदित्य शाक्य, अमित लामा, अञ्जल श्रेष्ठ, दीपेन्द्र बिक, दीपेश गुरुङ, निराजन धामी, समिर तामाङ र सन्तोष खत्री भने बाहिरिएका छन्।
एसियन कप छनोटमा नेपाल समूह ‘एफ’ मा छ। समूहमा नेपालसँगै मलेसिया, लाओस र भियतनामसँगै छन्।
नेपालले अहिलेसम्म समूह चरणमा दुई खेल खेलेको छ। तर दुवै खेलमा हार बेहोरेको कारण अंक जोड्न सकेको छैन।
नेपालले मलेसिया र लाओसविरूद्ध अवे खेलमा पराजय भोगेको थियो।
नेपालले छनोटको अब असोज २३ गते भियतनामसँग उसैको मैदानमा खेल्ने तालिका छ। त्यसको एक सातापछि नेपालमा भियतनामले खेल्ने तालिका भए पनि सो खेल मैदानका कारण नहुने भएको छ। असोज २८ हुने खेल पनि भियतनामै हुनेछ।
नेपाली टोली सोमबार भियतनाम जाने कार्यक्रम छ।
नेपाली टोली
किरण कुमार लिम्बु (गोलकिपर), विशाल सुनार (गोलकिपर), दिप कार्की (गोलकिपर), अनन्त तामाङ, कृतिश रत्न छुन्जु, कुशल देउबा, अन्जन बिष्ट, लाकेन लिम्बु, एरिक बिष्ट, मणीकुमार लामा, आयुष घलान, मनिष डाँगी, बिमल पाण्डे, रोहित चन्द, रोहन कार्की, सनिश श्रेष्ठ, दिनेश हेञ्जन, सुभास ठकुरी, जिलेस्पीजंग कार्की, सुमित श्रेष्ठ, सुमन श्रेष्ठ, योगेश गुरुङ
प्रमुख प्रशिक्षक: म्याट रोस
-1746009348.jpg)
