काभ्रेपलाञ्चोकमा बोलेरो दुर्घटना हुँदा ६ जनाको मृत्यु भएको छ ।
मङ्गलबार बिहान काभ्रेपलाञ्चोकको रोशी गाउँपालिका–३ शिखरआम्बोटेको निङ्गालेमा १७ जना यात्रु बोकेको बोलेरो दुर्घटना हुँदा ६ जनाको मृत्यु भएको प्रहरीले जनाएको छ ।
बनेपाबाट डाँडापारी जाने क्रममा शिखरआम्बोटेको निङ्गाले भन्ने ठाउँमा पुग्दा बिहान पौने ११ बजेतिर बा १४ च ९५५६ नम्बरको बोलेरो दुर्घटना भएको प्रहरीले बताएको छ ।
जिल्ला प्रहरी कार्यालय काभ्रेपलाञ्चोकका प्रहरी निरीक्षक रविराज थपलियाका अनुसार मृत्यु हुनेमा महाभारत गाउँपालिका– २ का ३५ वर्षीया खेलीमाया बल, २० वर्षीया पुतलीमाया बल, २२ वर्षीया म्हेन्दोमाया जिम्बा, २७ वर्षीया मनिषा मोक्तान, १९ वर्षीया कुमारी जिम्बा र अर्का एक जना पुरुषको सनाखत हुन बाँकी छ ।
एक वर्ष आठ महिनाकी कृष्टिना मोक्तान हराइरहेको जनाइएको छ । प्रहरीले घाइते अभिषेक तामाङको हेलिकप्टरबाट उद्धार गरी काठमाडौंमा उपचारका लागि लगिएको जनाएको छ । बाँकी घाइतेको उद्धार भइरहेको छ ।
दशैंमा घर जानेहरूले सो गाडी रिजर्भमा लगेका थिए। अोभर लोडका कारण दुर्घटना हुन सक्ने प्रहरीले जानकारी दिएको छ।
