द्वन्द्वपीडितलाई विश्वासमा लिएर काम गर्न राष्ट्रिय मानवअधिकार आयोगले आग्रह गरेको छ।
बिहीबार राष्ट्रिय मानव अधिकार आयोगले विज्ञप्ति जारी गर्दै द्वन्द्वपीडितलाई विश्वासमा लिएर काम गर्न आग्रह गरेको हो।
दुई वर्षदेखि रिक्त संक्रमणकालीन न्याय सम्बन्धी दुई आयोगहरू गठन गरेको सन्दर्भमा द्वन्द्वपीडितहरूको असहमतिप्रति आयोगको गम्भीर ध्यानाकर्षण भएको विज्ञप्तिमा उल्लेख गरिएको छ।
'पीडितहरूको स्वीकार्यता, विश्वसनीयता र सहयोगबाटमात्र संक्रमणकालीन न्याय टुङगोमा पुग्दछ भन्ने कुरामा आयोग स्पष्ट छ। विवाद र असहमतिलाई वार्ता र संवादका माध्यमबाट नै निकास दिन सकिने हुँदा द्वन्द्वपीडिलाई न्याय सुनिश्चित हुने विश्वास दिलाउन आवश्यक छ,' विज्ञप्तिमा भनिएको छ।
संक्रमणकालीन न्याय टुङ्ग्याउन विगतमा गरिएका प्रयासहरूको असफलताबाट पाठ सिक्दै पुन: सो नियति नदोहोरियोस् भनी सबै पक्ष गम्भीर हुन आवश्यक रहेको आयोगले बताएको छ।
संक्रमणकालीन न्याय पीडितको सन्तुष्टिमा केन्द्रित हुनुपर्ने कुरामा आयोग दृढ रहेको पनि उल्लेख गरिएको छ।
'संक्रमणकालीन न्यायका अन्तर्राष्ट्रिय अभ्यासहरूलाई आत्मसाथ गर्दै संक्रमणकालीन न्यायलाई विशुद्ध कानुनी प्रकृतिको न्यायिक निरूपणको विषय मात्र नबुझी पीडितको सन्तुष्टिलाई केन्द्रमा राख्न, भविष्यमा द्वन्द्व नदोहोरियोस् भन्ने विचार पुर्याउनुपर्छ,' विज्ञप्तिमा भनिएको छ।
-1746009348.jpg)
