रूपन्देहीको सीमा नाकाहरूमा सुरक्षा निकायले निगरानी बढाएको छ।
रूपन्देहीका प्रमुख जिल्ला अधिकारी बासुदेव घिमिरेले छिमेकी मुलुक भारत र पाकिस्तानबीच द्वन्द्व चर्किंदै जाँदा सम्भावित जोखिमलाई ध्यानमा राखेर सीमा क्षेत्रमा निगरानी बढाइएको जानकारी दिए।
सीमा नाकाहरूमा सुरक्षा निगरानी र सुरक्षाकर्मी परिचालन नियमित रूपमै हुँदै आए पनि पछिल्लो समय विकसित परिस्थितिलाई हेरेर नेपाल प्रहरी र सशस्त्र प्रहरी बलले नेपाल–भारत सीमा क्षेत्रबाट कुनै पनि किसिमको अवैध आवतजावत नहोस् भनेर निगरानी बढाएको प्रमुख जिल्ला अधिकारी घिमिरेले बताए।
‘छिमेकी मुलुकहरूमा द्वन्द्व चर्किंदै जाँदा नेपालमा कुनै प्रकारको गतिविधि नहोस् भनेर हामी आफैले स्वतः स्फुर्त रूपमा सीमा नाकामा सुरक्षा निगरानी बढाएका हौं,’ प्रमुख जिल्ला अधिकारी घिमिरेले भने।
गत बुधबारदेखि भारतले पाकिस्तानमा द्वन्द्व चर्किएपछि बिहीबारदेखि नेपाल भारत सीमा नाकामा निगरानी बढाइएको हो।
सीमा नाकाबाट अवैध घुसपैठ र आवतजावत हुनसक्ने भन्दै सुरक्षा निगरानीलाई थप कडा पारिएको प्रमुख जिल्ला अधिकारी घिमिरेले बताए।
प्रमुख जिल्ला अधिकारी घिमिरेका अनुसार सशस्त्र प्रहरीले सीमा क्षेत्रमा तालिम प्राप्त कुकुर समेत परिचालन गरेर निगरानी बढाएको छ।
सीमा क्षेत्रमा सशस्त्र प्रहरीको प्रधान कार्यालयले सीमाको सुरक्षार्थ डग हेण्डलरसहित यसअघि नै पठाएको डेजी र साया नामका तालिम प्राप्त कुकुर परिचालन गरी निगरानी गरिएको छ। डेजी र सायाको प्रयोग आवश्यकताका आधारमा सबै नाकामा गर्न सकिने सशस्त्रले जनाएको छ।
प्रमुख जिल्ला अधिकारी घिमिरेका अनुसार जिल्लाको मुख्य नाका बेलहियासहित रूपन्देहीका अरू नाकाहरू लुम्बिनी, भगवानपुर, मर्चवार, दुर्गौलिया लगायतबाट हुने गरेको मानिसहरूको आउजाउलाई पनि सशस्त्र प्रहरीले निगरानी गरिरहेको छ।
गाडी, मोटरसाइकल वा साइकल चढेर आउने तथा पैदलयात्रा गरी आउजाउ गर्ने दुबै देशका नागरिकप्रति कडा निगरानी गर्नुको साथै आवश्यकताको आधारमा सोधीखोजी र खानतलासी समेत गर्ने गरिएको छ।
शंकास्पद लागेका व्यक्तिहरूको परिचय पत्र हेरेर मात्रै नेपाल प्रवेश गर्न दिइएको छ भने नेपाल प्रवेश गर्नेहरूको अभिलेख समेत सीमा नाकामा राख्ने गरिएको प्रमुख जिल्ला अधिकारी घिमिरेले बताए।
सशस्त्र प्रहरीले जिल्लाका सीमा नाकामा २४ सै घण्टा निगरानी गर्दै आएको छ भने नेपाल प्रहरीले पनि आवश्यकताका आधारमा नियमित गस्ती गर्दै आइरहेको छ। सादा पोशाकमा रहेका सुरक्षाकर्मीले समेत गाडी, मोटरसाइकल, साइकल र पैदल गस्ती गरिरहेका छन्।
रूपन्देहीको करिब ७० किलोमिटर दक्षिणी भाग भारतसँग सीमा जोडिएको छ। सीमा नाका लामो र खुला भएकाले पनि अझ बढी चनाखो भएर सीमा निगरानी गर्नुपर्ने प्रमुख जिल्ला अधिकारी घिमिरेले बताए।
अहिलेसम्म सीमा क्षेत्रबाट कुनै शंकास्पद व्यक्ति आउजाउ गरेको नपाइएको र भारतीय सुरक्षा बलले पनि औपचारिक रूपमा कुनै जानकारी नगराए पनि सीमा सुरक्षाको दायित्वका हिसाबले नाकामा निगरानी बढाइएको प्रमुख जिल्ला अधिकारी घिमिरेले बताए।
भारतीय सीमा सुरक्षा बलले भने मुख्य र भित्री नाकामा समेत सीमा सुरक्षा बल तैनाथ गरेको छ।
उनीहरूले हरेक व्यक्तिलाई केरकार गर्ने, खानतलासी गर्ने र आवश्यकताका आधारमा भारत प्रवेश गर्ने सर्वसाधारणको फोटो खिचेर राख्ने काम समेत गरिरहेका छन्।
-1746797253.jpg)
-1746797253.jpg)
-1746797251.jpg)
-1746797251.jpg)
-1746797249.jpg)
-1746797249.jpg)
-1746797251.jpg)
-1746797251.jpg)
-1746797249.jpg)
-1746797251.jpg)
