नेपाली सेनाको सैनिक कल्याणकारी कोषबाट दुई करोडभन्दा बढी रकम घोटाला भएको खुलेको छ।
कोषको दुई करोड २१ लाख ८५ हजार ५१५ रुपैयाँ घोटाला गरेको आरोपमा दुई जना पूर्व सैनिकविरूद्ध काठमाडौं जिल्ला अदालतमा मुद्दा समेत दायर भएको छ।
सैनिक प्रहरी गण जंगी अड्डाले यसबारे अनुसन्धान गर्न जिल्ला प्रहरी परिसर काठमाडौंलाई गत चैत ३१ गते पत्राचार गरेको थियो।
सैनिक प्रहरीले नेपाली सेनाका पूर्व जमदार आत्मराम थापा र सेनानी लक्ष्मण अधिकारीमाथि अनुसन्धान गर्न भनेर पत्राचार गरेको हो।
प्रहरीले आत्मराम थापालाई पक्राउ गरी अनुसन्धान गरेको थियो। तर लक्ष्मण अधिकारी फरार छन्।
उनीहरू दुबै जनाविरूद्ध सरकारी वकिल कार्यालय काठमाडौंले आपराधिक विश्वासघातको कसुरमा जिल्ला अदालत काठमाडौंमा बिहीबार मुद्दा दायर गरेको छ।
जमदार थापाले घोटाला भएको विषयमा बयानमा समेत उल्लेख गरेका छन्।
थापाले प्रहरी र सरकारी वकिल कार्यालयमा बयान दिँदा आफूले अरूले भने बमोजिम काम गरेको बताएका हुन्। उनी २०७३ सालदेखि २०७५ सालसम्म सैनिक कल्याणकारी निर्देशनालयमा कार्यरत थिए।
त्यस कार्यालयको आवास तथा बीमा शाखाका राजीनामा उपदान, मृतक सकल दर्जाका कर्मचारीहरूले प्राप्त गर्ने आवास तथा बिमा बापतको रकम भुक्तानी गर्ने शाखामा कार्यरत थिए।
उनी त्यहाँ कार्यरत रहँदा तत्कालीन सेनानी लक्ष्मण अधिकारी, तत्कालीन सेनानी बोधराज कार्की, तत्कालीन प्रमुख सेनानी रोशन खड्का कार्यरत थिए।
लक्ष्मण अहिले अवकाश प्राप्त हुन्। बोधराज कार्की बहालवाला सेनानी हुन् भने रोशन खड्का सहायक रथी छन्।
उनीहरूमाथि सैनिक ऐन अधिकारभित्र परेको भन्दै सेनाले कोर्ट अफ इन्क्वायरी गठन गरी छानबिन गरिरहेको छ।
‘लक्ष्मण अधिकारी समेतले भने बमोजिम तथा दिएको लिष्ट बमोजिमको चेकहरू तयार गर्न लगाउने गरेकाले मैले सोही अनुसार चेकहरू भरिसकेपछि भुक्तानी लिएर आउनु भनेर पठाउने गरेकाले मैले सो चेकहरू सटही गरी नगदै रकम लिई तत्कालीन सेनानी लक्ष्मण अधिकारी र तत्कालीन सेनानी बोधराज कार्की, तत्कालीन प्रमुख सेनानी रोशन खड्का समेतलाई दिने गर्थे,’ थापाले प्रहरीसँगको बयानमा भनेका छन्।
उनले त्यसबेला काम गर्ने आफू सबभन्दा जुनियर रहेको र सेनामा चेन अफ कमाण्डअनुसार चल्ने संस्था भएकाले त्यसअनुसार नै काम गरेको बताएका छन्।
उनीहरूले मिलेमतो गरी वास्तविक रूपमा भुक्तानी गर्नुपर्ने व्यक्तिको नाममा नगरेको र विभिन्न काल्पनिक तथा दोहोरो नाम खडा गरी भुक्तानी लिएको खुलेको हो।
यसरी उनीहरूले मिलेमतो गरी २०७४ कात्तिक १३ गतेदेखि २०७५ भदौ २६ गतेसम्म १४४ वटा चेकबाट एक करोड ७४ लाख २१ हजार ३२९ रुपैयाँ भुक्तानी लिएको खुलेको हो।
त्यस्तै त्यसअघि २०७३ फागुन ९ गतेदेखि २०७५ असोज १७ गतेसम्मको ४० वटा चेकबाट ४७ लाख ६४ हजार १८५ रुपैयाँ अपचलन गरेको अनुसन्धानमा खुलेको हो।
यी चेकहरू आत्मराम थापा आफैले नै हस्ताक्षर गरेको उल्लेख गरेका छन्।
अरूले भने बमोजिम काम गर्दा सेनानी लक्ष्मण अधिकारीले आफूलाई बिदामा सहुलियत, पेट्रोलको कुपन तथा क्यान्टिनमा खाजा खाएकोमा पैसा समेत तिरिदिने गरेको बयानमा थापाले बताएका छन्।
उनीहरू दुई जनाले सेनाबाट अवकास पाएको दुई वर्ष बितिसकेको हुँदा सैनिक ऐन आकर्षित नभएको भन्दै प्रहरीलाई पत्राचार गरेको खुलेको हो।
उनीहरूबाट सरकारी वकिलले दुई करोड २१ लाख ८५ हजार ५१५ रुपैयाँ बिगो कायम गरी पीडितलाई भर्पाइ गराउन माग दाबी गरेको छ। लक्ष्मण अधिकारीविरूद्ध अदालतबाट पक्राउ पुर्जी जारी भएको छ। उनी फरार छन्।
-1746009348.jpg)
