हाल देशभर स्थानीय वायुको आंशिक प्रभाव छ।
उल्लेख्य पानी पार्ने प्रणाली नभित्रिएका कारण देशभर गर्मी बढेको छ। यो क्रम आज र भोलि पनि जारी रहने मौसम पूर्वानुमान महाशाखाको प्रक्षेपण छ।
काठमाडौंमै पनि तुलनतात्मक रूपमा गर्मी बढ्दै गएको छ। बिहीबार बिहान ५:४५ को मापनअनुसार काठमाडौंको न्यूनतम तापक्रम १६ डिग्री सेल्सियस छ।
बुधबार अधिकतम तापक्रम ३२.५ डिग्री सेल्सियस मापन भएको थियो।
आज दिउँसो पनि काठमाडौंको तापक्रम सोही हाराहारीमा हुने पूर्वानुमान रहेको मौसमविद सञ्जिब अधिकारीले जानकारी दिए।
केही स्थानहरूमा तापक्रम ४० डिग्री सेल्सियस समेत पुग्न सक्ने सम्भावना रहेको उनले बताए।
बुधबार धनगढी, नेपालगन्ज, भैरहवा, सिमरामा तापक्रम ३८ देखि ४० डिग्री सेल्सियस पुगेको थियो। भैरहवामा ४० देखि ४२ डिग्री अधिकतम तापक्रम पुगेको महाशाखाको विवरणमा उल्लेख छ।
ती क्षेत्रहरूका बिहीबार र शुक्रबार नै तापक्रम घट्ने नदेखिएको मौसमविद अधिकारीले जानकारी दिए।
'केही ठाउँहरूमा तापक्रम ४० डिग्री सेल्सियससम्म पुग्ने देखिन्छ। आज र भोलि अझै बढ्न सक्छ,' उनले भने।
स्थानीय वायुको प्रभावले बिहीबार दिउँसो कोशी र गण्डकी प्रदेशका उच्च पहाडी भूभागका एक दुईस्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको उनले बताए।
राति भने पानी पर्ने सम्भावना छैन।
सामान्यतया अधिकतम ४० डिग्रीभन्दा माथि तापक्रम रहन थालेपछि तातो हावा चल्ने पूर्वानुमान गरिन्छ। लगातार दुई-तीन दिन तापक्रम ४० डिग्री तापक्रम रहे तातो हावाको चेतावनी जारी गरिन्छ।
मौसमविद्का अनुसार शनिबारसम्म नेपालमा पानी पार्ने प्रणाली सक्रिय हुने छैन। शनिबारसम्म गर्मी बढ्ने, सुख्खा छाउने मौसमविद् विनोद पोखरेलले बताए।
‘यो हप्ता राम्रै गर्मी र सुख्खा हुने देखिन्छ। तर अर्को वर्षालाई मनसुनसम्म कुनु पर्दैन,’ उनले भने।
उनले शनिबारदेखि पूर्वी नेपाल र बागमतीका पहाडी भेगमा वर्षा सुरू हुने उनले बताए।
‘अर्को हप्ता लगभग फेरि गएको हप्ताको जस्तै धेरै ठाउँमा वर्षा हुने देखिन्छ,’ उनले भने।
-1746009348.jpg)
