चीनको सीमा नाका उपल्लो डोल्पाको पिलर नम्बर १५ मा पहिलोपटक प्रमुख जिल्ला अधिकारी, प्रहरी प्रमुख, स्थानीय जनप्रतिनिधिको टोली पुगेको छ।
लगातार पाँच दिनको पैदल यात्रापछि साउन ५ गते टोली त्यहाँ पुगेको हो।
यसअघि यहाँ सुरक्षा अधिकारीहरू बिलरै पुग्थे र त्यो पनि हेलिकप्टरमा चढेर।
जिल्ला प्रहरी प्रमुख डिएसपी रूकबहादुर खड्का र प्रमुख जिल्ला अधिकारी रोमबहादुर महत सहितको सुरक्षा टोली पहिलो पटक पाँच दिनको पैदल यात्रापछि उपल्लो डोल्पा पुगेको हो।
जिल्ला प्रहरी प्रमुख खड्काले मातहतका प्रहरी युनिटका कर्मचारीलाई उत्प्रेरणा दिने मनसायका साथै प्रहरीको बसाइँ निरीक्षण गर्न त्यहाँ पुगेको बताए।
साउन १ गते यात्रा थालेका प्रमुख जिल्ला अधिकारीसहित प्रहरी प्रमुखको टोली साउन ५ गते बेलुका मात्रै पैदल हिँडेर उपल्लो डोल्पा पुगेको थियो। यसअघि यसरी जिल्लास्थित सुरक्षा प्रमुखहरू कोही पनि पैदल हिँडेर उपल्लो डोल्पा पुगेको रेकर्ड थिएन।
सुरूमा सहतारा, लाछिक्याप, नावरपाली, धुप,ताक्क्षी, तिन्जे प्रहरीका प्रहरी कर्मचारीसँग अन्तर संवाद गर्दै प्रहरी उपल्लो डोल्पा पुगेको डिएसपी खड्काले बताए।
केही स्थानमा गाडी चढ्न सम्भव भए पनि अधिकांश ठाउँमा पैदल हिँडेर त्यो यात्रा पूरा गरेको खड्काले बताए।
त्यो बीचमा मातहतका न्युनिटका प्रहरी कर्मचारीसँग छलफल र परामर्श गर्नुका साथै सुरक्षा अधिकारीले स्थानीय जनतासँग पनि ठाउँ ठाउँमा राज्यले प्रदान गरेका सेवा प्रवाहबारे छलफल गरेका थिए।
सर्वसाधारणसँग राज्यको सेवा प्रतिको प्रतिक्रिया र सुधार गर्नुपर्ने पक्षका बारेमा छलफल, परामर्श र अन्तर्क्रिया गर्दै आफूहरू उपल्लो डोल्पा पुगेको डिएसपी खड्काले बताए।
यो भ्रमणको प्रमुख उद्देश्य भने पैदल नाकाको भ्रमणसँगै उपल्लो डोल्पाका तीन पालिकामा राष्ट्रिय परिचयपत्र वितरणको अवस्था बुझ्नु पनि थियो।
यात्राको क्रममा स्थानीयको घर–घरमै पुगेर चीन प्रवेश–निर्गमन पास वितरण गरिएको, बस्ती–बस्तीमा पुगेर जनजीवनका समस्याहरू नजिकबाट बुझ्ने काम भएको, त्यस क्षेत्रमा कार्यरत सरकारी कर्मचारीले सीमित स्रोतसाधन र विषम मौसममा सेवा दिँदै आएका कठिनाइलाई पनि प्रत्यक्ष रूपमा अवलोकन गर्न मिलेको, ऐतिहासिक, धार्मिक र सांस्कृतिक महत्व बोकेका स्थलहरूमा महत्व बुझ्ने काम भएको सुरक्षा प्रमुखहरूले जानकारी दिएका छन्।
स्थानीयले जिल्लाका सुरक्षा प्रमुख तथा स्थानीय जनप्रतिनिधिहरूसँग भेरी करिडोरको छिटो र निर्बाध निर्माण गरिनु पर्ने, इलाका प्रशासन कार्यालय डोहोमा स्थायी रूपमा स्थापना गरिनु पर्ने, माथिल्लो डोल्पा क्षेत्रभरि फोर जी मोबाइल सेवा विस्तार गरिनु पर्ने माग गरेका थिए।
साथै, चीनको नाका नियमित र कानूनी रूपमा सञ्चालन गरिनु पर्ने, सीमावर्ती क्षेत्रहरूमा आवश्यक पूर्वाधार विकास, सुख्खा बन्दरगाह स्थापना र अन्य व्यापारिक संरचनाहरू निर्माण गर्न राज्यले ध्यान दिनुपर्ने स्थानीयले माग गरेका थिए।
भ्रमण टोलीमा पछि बुद्ध गाउँपालिकाका अध्यक्ष कार्मा छोइबेल गुरूङ, उपाध्यक्ष पेम्बा धोर्चे गुरूङ, प्रमुख प्रशासकीय अधिकृत मनबहादुर थापा, शिक्षा शाखा प्रमुख निर्मोद केसी पनि जोडिएका थिए।
-1746009348.jpg)
