काठमाडौंका तीन क्षेत्रका सुन रिफाइनिङ सेन्टरमा प्रहरीले छापा मारेको छ।
जोरपाटी, कपन र चाबहिलका सुन रिफाइनिङ सेन्टरमा छापा मार्दा १ करोडभन्दा बढी मूल्य बराबरको अवैध सुन बरामद गरेको जिल्ला प्रहरी परिसर काठमाडौंले जनाएको छ।
काठमाडौंका विभिन्न स्थानहरूमा सुन तथा चाँदीको अवैध कारोबार भइरहेको भनेर प्रहरीले सूचना पाएको थियो। सोही सूचनाको आधारमा जिल्ला प्रहरी परिसर, काठमाडौं र प्रहरी वृत्त बौद्धबाट खटिएको प्रहरी टोलीले विभिन्न सुन रिफाइनिङ एण्ड टंच सेन्टरहरूमा खानतलासी गरेको थियो।
प्रहरीले सोही क्रममा ९ जनालाई समेत पक्राउ गरेको छ।
पक्राउ पर्नेमा भारत घर भएका गोकर्णेश्वर न.पा. ५ जोरपाटी बस्ने ३० वर्षका नबनाथ बाकु कसीद, गोकर्णेश्वर न.पा. ५ जोरपाटी बस्ने २० वर्षका सन्दिप पोपट हजारे, चाबहिल बस्ने २२ वर्षका अन्सार दिलावर सिकल्गार, चाबहिल बस्ने १८ वर्षका एक किशोर, बूढानीलकण्ठ न.पा.१२ बस्ने २१ वर्षका अरमान हनिफ ईनामदाय छन्।
यस्तै, बूढानीलकण्ठ न.पा. १२ बस्ने २२ वर्षका मनोज सुभाष सकट, काठमाडौं- ७ बस्ने ३८ वर्षका अमोल कुमार गोस्ले, चाबहिल बस्ने २० वर्षका सुनिल मिटकरी र चाबहिल बस्ने २० वर्षका सुरज नन्दीवालीलाई पक्राउ गरिएको प्रहरीले जनाएको छ।
उनीहरूको साथबाट प्रहरीले १ सय ७६ ग्राम सुन (अहिलेको मूल्य: १,७०,१०,०६०) , १८ सय ४५ ग्राम चाँदी ८ लाख २७ हजार नगद र ११ हजार ७ सय भारू नोट बरामद गरेको छ।
पक्राउ परेकाहरूमाथि थप अनुसन्धान गर्नका लागि आन्तरिक राजस्व विभाग, हरिहर भवन ललितपुर पठाइएको प्रहरीले जनाएको छ।
-1746009348.jpg)
