काठमाडौंमा केही दिनदेखि बिहानीपख चिसो केही बढेको अनुभव भएको छ।
बिहान तापक्रम तुलनात्मक रूपमा घटिरहेको र अलि बढी चिसो हुँदै गएको देखिन्छ।
बिहीबार न्यूनतम तापक्रम ८ डिग्री सेल्सियस मापन भएको थियो। त्यसयता न्यूनतम तापक्रम लगातार घटिरहेको छ। शुक्रबार ६.२, शनिबार ५.८ र आइतबार ४.५ डिग्री सेल्सियस मापन भएको थियो।
सोमबार बिहान पनि न्यूनतम तापक्रम त्यति धेरै घटबढ भएको छैन।
जल तथा मौसम पूर्वानुमान महाशाखाका अनुसार बिहान ५:४५ बजे काठमाडौंको न्यूनतम तापक्रम ४.८ डिग्री सेल्सियस मापन भएको छ।
आकाश बिहानैदेखि खुला हुँदा न्यूनतम तापक्रम घटेको र चिसो अलि बढी महशुस भएको मौसमविद बिनु महर्जन बताउँछिन्।
२/३ अगाडि बिहानको समयमा पनि आकाश बादलले ढाकेको हुन्थ्यो र त्यसले न्यूनतम तापक्रम बढ्न दिँदैनथ्यो। अहिले बिहानैदेखि मौसम सफा देखिएकाले चिसो अलि बढी महशुस भएको हो,' महर्जनले भनिन्।
बिहानैदेखि मौसम खुला हुँदा दिउँसोको समयमा भने घाम राम्ररी लाग्दा अधिकतम तापक्रम बढ्ने उनले बताइन्।
आइतबार काठमाडौंको अधिकतम तापक्रम २३.५ डिग्री सेल्सियस मापन भएको थियो।
आज पनि सोही हाराहारीमा अधिकतम तापक्रम रहने पूर्वाुनमान छ।
सोमबार रातिदेखि भने पश्चिम न्यूनचापीय प्रणाली विकसित भएर पश्चिमी भूभागहरूमा केही बदली गराउने सम्भावना छ। यसले बदली र छिटपुट वर्षा गराउने महाशाखाको पूर्वानुमान छ। त्यसो हुँदा पश्चिमी भूभागमा अधिकतम तापक्रम केही घट्ने सम्भावना रहन्छ।
-1746009348.jpg)
