प्रहरीले वरिष्ठ अधिवक्ता दिनेश त्रिपाठीमाथि कुटपिट गरेको आरोपमा टोखाबाट थप एक जनालाई पक्राउ गरेको छ।
हुम्लाको अदानचुली गाउँपालिका–४ घर भई काठमाडौंस्थित सूर्यदर्शन हाइटमा बस्ने ३२ वर्षीय महानन्द जैसी भनिने महेन्द्र पाण्डेलाई पक्राउ गरेको जिल्ला प्रहरी परिसर काठमाडौंका एसपी एवं प्रवक्ता नवराज अधिकारीले जानकारी दिए।
उनका अनुसार उनीविरूद्ध प्रहरी वृत्त सिंहदरबारबाट अनुसन्धान भइरहेको छ।
बुधबार जिल्ला अदालत काठमाडौंको दक्षिण गेट बाहिर त्रिपाठीमाथि कुटपिट भएको थियो। यसअघि ललित केसीलाई त्रिपाठीमाथि कुटपिट गरेको आरोपमा पक्राउ गरेको थियो।
पक्राउ परेकाहरूविरूद्ध ज्यान मार्ने उद्योगको कसुरमा प्रहरीले अनुसन्धान अघि बढाएको उनले बताए।
