स्याङ्जामा टिपर दुर्घटना हुँदा एक जनाको मृत्यु भएको छ।
शुक्रबार राति ११ बजे स्याङ्जाको आँधीखोला गाउँपालिका-५ स्थित कृषि-ओहिया भित्री सडकमा ग १ क ५१३९ नम्बरको ट्रक सडकबाट अन्दाजी ५० मिटर तल खसेर दुर्घटना हुँदा टिपरमा सवार एक जनाको मृत्यु भएको हो।
मृत्यु हुनेमा पर्वतको कुश्मा नगरपालिका-१४ का ३७ वर्षीय चन्द्रबहादुर नेपाली छन्। दुर्घटनामा गम्भीर घाइते भएका उनको उपचारका क्रममा गण्डकी अस्पताल पोखरामा गएराति १ बजे मृत्यु भएको जिल्ला प्रहरी कार्यालय स्याङ्जाले जनाएको छ।
दुर्घटनामा चार जना घाइते भएका छन्।
घाइतेहरूमा सल्यानको सारदा नगरपालिका-७ का १५ वर्षीय हरि परियार, स्याङ्जाको आँधीखोला गाउँपालिका-२ ओहियाका ३३ वर्षीय कमल नेपाली, चितवनको राप्ति नगरपालिका-६ भण्डाराका ४१ वर्षीय प्रकाश विक र चितवनकै राप्ति नगरपालिका-६ भण्डाराकै सुमित्रा विक घाइते भएका छन्।
घाइतेहरुको गण्डकी अस्पताल पोखरामा उपचार भइरहेको छ।
