शुक्रबारदेखिको अविरल वर्षापछि राप्ती नदीमा आएको बाढीले बगाउँदा दाङमा दुई जना बेपत्ता छन् भने अर्का एक जनाको बाढीले ट्र्याक्टर बगाउँदा मृत्यु भएको छ।
राप्ती नदीले बगाउँदा लमही नगरपालिका–८ बग्रापुरस्थित नयाँ बस्तीका ६२ वर्षीय मनियम चौधरी बेपत्ता भएका छन्। बिहान ११ बजेतिर बग्रापुर गएका उनलाई अविरल वर्षापछि राप्ती नदीमा आएको बाढीले दिउँसोतिर बगाएर बेपत्ता पारेको थियो।
जिल्ला प्रहरी प्रमुख एसपी रामबहादुर केसीका अनुसार चौधरीको खोजीमा नेपाल प्रहरीको टोली र सशस्त्र प्रहरी बल नेपाल नं. २९ ज्वालामाई गण भालुबाङको टोली खटिएको छ।
त्यस्तै, राप्ती नदीले बगाउँदा राजपुरका एक युवक बेपत्ता छन्।
राजपुर गाउँपालिका–२ का १९ वर्षीय राजकुमार यादव शनिबार बिहान लमही नगरपालिका – ७ हस्नापुर नजिकबाट राप्ती नदी तर्ने क्रममा बाढीले बगाएपछि बेपत्ता छन्। उनी बिहानै राजपुरबाट दूध बेच्नका लागि लमही आएका थिए।
राजपुर–२ कै ४० वर्षीय दयाराम यादव र ४८ वर्षीय तुलाराम यादवको भने उद्धार भएको थियो।
नेपाल सशस्त्र प्रहरी बल ४१ नम्बर रिजर्भ गण अर्जुन खोलाबाट खटिएका सुरक्षाकर्मीले दुई जनालाई उद्धार गरेका हुन्।
उनीहरू रूखमा चढेर ज्यान जोगाउन सफल भएका थिए।
इलाका प्रहरी कार्यालय अमेलीका प्रमुख प्रहरी निरीक्षक लालबहादुर श्रेष्ठ बेपत्ता युवकको खोजी कार्य जारी छ।
त्यस्तै जिल्लाकै राजपुर गाउँपालिका – ५ सालभौडीस्थित गंगदी खोलामा आएको बाढीले ट्र्याक्टर बगाउँदा स्थानीय छेदुराम चौधरीको मृत्यु भएको छ।
खोलामा आएको बाढी कम भएपछि दिउँसो ट्र्याक्टर निकाल्ने क्रममा चौधरीको शव ट्याक्टरले च्यापिएको अवस्थामा फेला परेको थियो। त्यसअघि उनलाई खोलामा आएको बाढीले बेपत्ता बनाएको आशंकामा खोजी गरिएको थियो।
खोलाको बाढीले ट्याक्टर बगाउँदा स्थानीय २४ वर्षीय राजकुमार चौधरी र २३ वर्षीय महेश यादव सामान्य घाइते भएको प्रहरी प्रमुख एसपी रामबहादुर केसीले बताए।
इलाका प्रहरी कार्यालय तुलसीपुरका प्रमुख डिएसपी ठाकुरप्रसाद पोख्रेलका अनुसार बबईमा आएको बाढीका कारण राप्ती राजमार्गअन्तर्गत तुलसीपुर–अमेलिया सडक खण्ड अवरूद्ध भएको छ।
बबई पुलको पल्लोपट्टि बखरिया साइडको सडक खण्डमा बबई नदीको भंगालो पसेका कारण सडकखण्ड अवरूद्ध बन्न पुगेको हो।
त्यस्तै, तुलसीपुर–घोराही सडकखण्ड अन्तर्गत घोराही उपमहनगरपालिका–१६ सर्रा पश्चिमको सेवार खोलाको झन्डै ३५ मिटर जति डाइभर्सन बाढीले बगाएको छ।
डाइभर्सन बगाएको हुँदा सडक खण्ड अवरूद्ध हुन गई वैकल्पिक मार्गमार्फत् सवारी साधान सञ्चालन गरिएको छ।
सिधा बाटो बन्द भएपछि भाइरल रोडमार्फत् सवारी साधान सञ्चालन हुँदै आएको छ।
त्यस्तै, दाङ देउखुरीको लमही नगरपालिका–९ ओलीकुटीमा रहेको सार्वजनिक पानी पोखरीको ड्याम फुट्न गएर तेलियादेखि तरूलिया जाने सडकखण्ड झन्डै १५ मिटर बगाउँदा सडक खण्ड अवरूद्ध भएको छ।
त्यस्तै, घोराही उपमहानगरपालिका–७ घस्रास्थित बबई नदीमा आएको बाढीले गोरखा बायो फर्ममा रहेका बंगुर, बाख्रा, हाँस र कुखुरा बगाएको छ।
यसैगरी, अविरल वर्षाका कारण राप्ती उपत्यका देउखुरीस्थित लुम्बिनी प्रदेश सरकारका मन्त्रालय समेत डुबानमा परेका छन्।
आर्थिक मामिला तथा योजना मन्त्रालय र आन्तरिक मामिला तथा कानून मन्त्रालय, सामाजिक विकास मन्त्रालय परिसर जलमग्न छन्। ती मन्त्रालयभित्र पानी समेत पसेको छ।
यी सबै मन्त्रालय एउटै कम्पाउन्डभित्र छन्। यहाँ भवन निर्माणको काम जारी छ।
निर्माणको काम जारी रहनु र उचित निकासको व्यवस्थापन नहुनुले गर्दा मन्त्रालयहरू डुबानमा परेका हुन्।
