भक्तपुरको सूर्यविनायक नगरपालिकास्थित केदारनाथको शिर भाग मानिने डोलेश्वर महादेव मन्दिरमा मनाइने महाशिवरात्री पर्वको तयारी पूरा भएको छ।
डोलेश्वर महादेव मन्दिर संरक्षण तथा विकास समितिले आज मन्दिर परिसरमा आयोजना गरेको पत्रकार सम्मेलनमा यसबारे जानकारी दिँदै महाशिवरात्री पर्वलाई भव्य रूपमा मनाउन सबै तयारी पूरा भएको मूल आयोजक समितिका संयोजक एवं समितिका वरिष्ठ अध्यक्ष विदुरमानसिंह बस्नेतले बताए।
महाशिवरात्री पर्वका लागि भारतबाट आजसम्ममा २५० नागा बाबा एवं साधुसन्त आइसकेका र साँझसम्म ५०० जना साधुसन्त आउने उनले जानकारी दिए।
डोलेश्वर आएका नागा बाबा एवं साधुसन्तलाई समितिले नै खाने, बस्ने, धुनी बाल्न दाउराको व्यवस्था गरिएको समितिका वरिष्ठ उपाध्यक्ष किरण थापाले जानकारी दिए। महाशिवरात्री पर्वमा डोलेश्वर आउने दर्शनार्थीका लागि बिहान ४ देखि राति १२ बजेसम्म मन्दिरको चारै वटा ढोका खुला गरेर दर्शनको व्यवस्था गरिने जानकारी दिँदै उनले पञ्चस्नान गर्न चाहने भक्तजनले एक हजार १ सय रुपैयाँको रसिद काटेर दर्शन एवं पूजा गर्न र यस दिन चार प्रहर पूजामा सहभागी हुन चाहने भक्तजनले ११ हजार १११ रुपैयाँको टिकट काटेर पूजामा सहभागी हुन पाउने व्यवस्था गरिएको जानकारी दिए।
प्रचारप्रसार समितिका संयोजक मोहन बल्लभले महाशिवरात्रीमा डोलेश्वर आएका नागा बाबा, साधुसन्तमध्येबाट महाशिवरात्रीको भोलिपल्टको बिदाइ कार्यक्रममा ‘क’ वर्गकालाई एक हजार १ सय ११ रुपैयाँ, ‘ख’ वर्गकालाई ७ सय ७७ रुपैयाँ र ‘ग’ वर्गकालाई ५ सय ५५ रुपैयाँनगदसहित एक–एक थान कम्बल र एक थान धोती दिएर बिदाइ गरिने बताए।
उक्त पर्वमा करीब १० लाख रुपैयाँ खर्च हुने अनुमान गरिएको र यसका लागि एक मूल समिति र सात वटा विभिन्न उपसमिति बनाइएको छ।
रासस
