नागरिक उन्मुक्ति पार्टी (नाउपा) को कार्यवाहक अध्यक्ष शिव बास्तोला भएका छन्।
अध्यक्ष रञ्जिता श्रेष्ठले स्वास्थ्यको कारण देखाउँदै वरिष्ठ उपाध्यक्ष बास्तोलालाई कार्यवाहक अध्यक्ष तोकेकी हुन्।
आफूले बास्तोलालाई शनिबार नै कार्यवाहक अध्यक्षको जिम्मेवारी दिएको अध्यक्ष श्रेष्ठले सेतोपाटीलाई जानकारी दिइन्।
विधानमा अध्यक्षले कार्यवाहक अध्यक्ष तोक्न सक्ने अधिकार रहेकोले त्यसअनुसार कार्यवाहक अध्यक्ष तोकिएको उनको भनाइ छ।
बास्तोला पोखराका हुन्।
नाउपाका एक जना नेताका अनुसार नाउपा गठन हुँदा निर्वाचन आयोगमा बुझाएको २१ सदस्यीय केन्द्रीय समितिमा भने बास्तोलाको नाम छैन। ‘त्यसैले निर्वाचन आयोगले बास्तोलालाई चिन्दैन,’ ती नेताले भने।
बास्तोला अध्यक्ष श्रेष्ठ र संरक्षक रेशम चौधरीनिकट मानिन्छन्।
अध्यक्ष रञ्जिता श्रेष्ठ पोखराको लिचीबारी जग्गासम्बन्धी घुस डिल प्रकरणमा मुछिएकी थिइन्। उनीसँग हालै अख्तियारले बयान पनि लिएको थियो।
साथै संरक्षक रेशम चौधरीले अध्यक्ष श्रेष्ठलाई लक्ष्य गर्दै आरोपमाथि केन्द्रीय समितिमा जबाफ दिनुपर्ने र भागेर हिँड्न नहुने बताएका थिए।
-1746009348.jpg)
