जगदुल्ला हाइड्रोपावरमा भएको अनियमितताबारे प्रतिनिधि सभाअन्तर्गतको सार्वजनिक लेखा समितिले प्रचलित कानूनअनुसार आवश्यक प्रक्रिया अघि बढाउन निर्देशन दिएको छ।
आज भएको छलफल पछिको निर्णय सुनाउँदै सभापति ऋषिकेश पोखरेलले प्रचलित कानूनहरू अनुसार उठेका विषयहरू छानबिन गर्न सम्बन्धित निकायलाई निर्देशन दिए।
पहिल्यै यो विषय अदालतमा गएको थाहा नभएका कारण छलफलमा ल्याइएको बताउँदै आगामी दिनमा यस्ता विषयमा सजगतापूर्वक छलफल चलाइने बताए।
समिति सभापति पोखरेलले भने, ‘उक्त विषय सर्वोच्च अदालतमा विचाराधीन भएको अवस्थामा हामीले यसबारे छलफल अघि बढाउनुपर्ने देखिएन। हामीले निकाल्ने निष्कर्षले कुनै परिणाम दिने देखिएन। प्रचलित कानूनविपरीत नहुने गरी सम्बन्धित निकायलाई जबाफदेही हुनेगरी आवश्यक प्रक्रिया अघि बढाउन निर्देशन दिने निर्णय गर्दछौं।’
पोखरेलले निर्णय सुनाउँदै गर्दा माओवादी सांसद अमनलाल मोदीले भने 'नोट अफ डिसेन्ट' भने।
उनले अनियमितताबारे गम्भीर रूपमा छानबिन हुनुपर्ने बताएका थिए।
सांसद मोदीले भने, ‘यस्ता अनियमितताका विषयमा यति हल्का निर्णय गरिन्छ भने मेरो सहमति छैन। नोट अफ डिसेन्ट।’
सांसद मोदीले समिति बैठकमा सो कुरा बताइरहँदा सभापति पोखरेलले भने अदालतमा गएको विषयमा समिति संयम हुनुपर्ने अवस्था आएको बताए।- न्युज एजेन्सी नेपाल
-1746009348.jpg)
