भूमि व्यवस्था, सहकारी तथा गरिबी निवारण मन्त्री बलराम अधिकारीले ३२ लाख रुपैयाँ घुस लिएको भन्ने अडिओ सार्वजनिक भएको छ।
पोखराको बाटुलेचौरमा रहेको १३४ रोपनी जग्गा दर्ता गर्ने प्रयोजनका लागि सेटिङमा ३२ लाख रुपैयाँ मन्त्री अधिकारीले घुस लिएको भन्ने अडिओ सार्वजनिक भएको हो।
यसअघि भूमि आयोग कास्कीको अध्यक्ष बनाउन २५ लाख र मालपोत कार्यालय कास्कीको तत्कालीन प्रमुखको सरूवा रोक्न ५३ लाख घुस लेनदेनसम्बन्धी 'डिल गरेको' अडिओ सार्वजनिक भएको थियो।
उक्त अडिओ सार्वजनिक भएपछि संघीय मामिला तथा सामान्य प्रशासन मन्त्री राजकुमार गुप्ताले पदबाट राजीनामा दिएका थिए। सो अडिओमा पनि भूमि मन्त्री अधिकारीले 'पैसा खाइसकेको' भन्ने सुनिन्थ्यो।
मन्त्री अधिकारीले ३२ लाख रुपैयाँ घुस लिएको विषयमा उनका छोरा मनोज अधिकारी र मन्त्रालयका तत्कालीन सचिव अर्जुन पोखरेलको नाम पनि जोडिएको छ।
मन्त्री अधिकारीले आज मन्त्रालयमा पत्रकार सम्मेलन गर्दै सार्वजनिक अडिओ आफ्नो नभएको र चरित्र हत्या गर्न खोजिएको बताएका छन्।
‘अडिओमा जोडिएका व्यक्तिहरू मन्त्रालय र मसँग जोडिएका हुन् कि होइनन् पहिचान गर्नुपर्यो, अडिओमा बोल्नेहरू हामीसँग सरोकार राख्नेहरू होइनन्, मैले त्यो अडिओमा बोलेको छ कि छैन भन्ने कुरा तपाईंहरूले प्रष्ट सुन्न सक्नुहुन्छ,’ मन्त्री अधिकारीले भने, ‘मेरो छोरोलाई पनि त्यहाँ जोड्ने काम भएको रहेछ, यो चरित्र हत्या गर्ने प्रयास हो।’
उनले आफ्नो अभिष्ट पूरा गर्न खोज्नेहरू पोखराको मालपोत अधिकृत सरूवा गर्न आएको र आफूले हुन्न भनेर जबाफ दिएको पनि बताएका छन्।
यस्तो छ अडिओ:
-1746009348.jpg)
