जनमत पार्टी र नागरिक उन्मुक्ति पार्टीबीचको एकता प्रक्रिया रोकिएसँगै दुई दलबीच विश्वासको संकट देखिएको घटना सार्वजनिक भइरहेका छन्।
यहीक्रममा जनमत पार्टी नेतृत्वमा रहेको मधेस प्रदेश सरकारलाई दिएको समर्थन मंगलबार नागरिक उन्मुक्ति पार्टीले फिर्ता लिएको छ। मधेसमा अहिले जनमतका नेता सतिश सिंह मुख्यमन्त्री छन्।
मधेस प्रदेश सभामा नागरिक उन्मुक्तिबाट एक जना सांसद छिन्। समानुपातिक सांसद उर्मिला देवी सिंहले मंगलबारको प्रदेश सभा बैठकमा सरकारलाई आफ्नो पार्टीले दिएको समर्थन फिर्ता लिएको बताएकी थिइन्।
‘केन्द्रको आदेश अनुसार नै मैले यहाँ सरकारलाई दिएको समर्थन फिर्ता लिएको हो,’ सांसद सिंहले सेतोपाटीसँग भनिन्, ‘केन्द्रमा पनि सरकारलाई दिएको समर्थन फिर्ता भयो। प्रदेशमा पनि त्यही अनुसार फिर्ता भएको हो।’
यसअघि पार्टी एकता घोषणा सभाको तयारी भएकै बेला नागरिक उन्मुक्तिका संरक्षक रेशम चौधरी सर्वोच्चका अधिकृतको अनधिकृत पत्रका कारण पक्राउ परेसँगै एकता प्रक्रिया भाँडिएको थियो।
त्यसयता यी दुई दलबीच एकता प्रक्रियालाई लिएर कुनै संवाद नभएको दुवै दलका नेताहरूले बताइरहेका छन्।
अन्तिम समयमा एकता बिथोलिएपछि जनमत र नाउपाबीच छलफल अहिले ठप्पप्रायः छ। यसबीचमा उनीहरू एकपटक पनि संवादमा बसेका छैनन्।
सुरूमा उनीहरूले असार १० गतेको पेसीलाई कारण देखाएका थिए। असार १० गते रेशम चौधरीले पाएको बाँकी कैद मिनाहाविरूद्ध सर्वोच्च अदालतमा परेको रिटको सुनुवाइ हुँदै थियो। २०७२ भदौ ७ गते टीकापुरमा मारिएका प्रहरी निरीक्षक केशव बोहराकी पत्नी शारदाले हालेको रिटमा असार १० गते सुनुवाइ तोकिएको थियो। यद्यपि त्यो सुनुवाइ पनि सरिरहेको छ।
जनमत पार्टीका एक नेताका अनुसार असार १० को सुनुवाइ बहाना मात्रै हो। वास्तवमा एकताको चाहना दुवै पार्टीमा टुटिसकेको छ। सिके राउत र रेशम चौधरीको रूचिबाट पर पुगिसकेको छ।
त्यसको पछिल्लो उदाहरण संयुक्त लोकतान्त्रिक मोर्चाले रूपन्देही–३ मा उठाउन खोजेको साझा उम्मेदवार र जनमतको असहमतिलाई लिन सकिन्छ।
जसपा नेपालका कार्यकारिणी सदस्य राजकिशोर यादवका अनुसार मोर्चाको बैठकमा नाउपा संरक्षक चौधरीले रूपन्देही–३ को उम्मेदवार आफ्नो पार्टीबाट हुनुपर्ने अडान राखेका छन्।
जसपा नेपाल, लोसपा, राष्ट्रिय मुक्ति पार्टी, हृदयेश त्रिपाठी (जनता प्रगतिशील पार्टी) र वृषेशचन्द्र लाल (तमलोपा) ले त्यसमा सहमति जनाएका छन्। तर सिके राउतले मानेका छैनन्। जनमत उपाध्यक्ष अब्दुल खानका अनुसार रूपन्देही–३ मा नाउपाको पनि मताधार राम्रो भएकाले पार्टीले आफै उम्मेदवार उठाउने तयारी गरेको छ।
-1746009348.jpg)
