राष्ट्रिय विपद् व्यवस्थापन परिषद्ले विपद् जोखिमलाई ध्यान दिँदै मौसम पूर्वानुमानपछिको पूर्वसूचनालाई प्रभावकारी बनाउन आवश्यक शतर्कता अपनाउने निर्णय गरेको छ।
आइतबार कार्यवाहक प्रधानमन्त्री प्रकाशमान सिंहको अध्यक्षतामा बसेको परिषद्को बैठकले केही दिनयता भइरहेको वर्षापछिको सम्भावित जोखिमलाई ध्यान दिँदै उक्त निर्णय गरेको जनाएको छ।
परिषद्को बैठकले जोखिम भएको ठाउँमा रातको समयमा सवारी साधन नचलाउने, भारी वर्षा भएको समय र क्षेत्र वरपर सुरक्षित रहन स्थानीयवासीलाई सूचना प्रवाह गर्ने, स्थानीय एफएम र सामाजिक सञ्जालमार्फत मौसम बुलेटिन तथा सूचना प्रशारण गर्ने व्यवस्था मिलाउने र विपद् प्रभावित क्षेत्रमा रिपोटिङको तत्काल व्यवस्था मिलाई विपद् प्रभावितलाई रेस्क्यु गर्न तत्काल व्यवस्था मिलाउने निर्णय गरेको छ।
सिंहले मौसम पूर्वानुमानपछिको पूर्वसूचना प्रभावकारी बनाउन र त्यसलाई कडाईका साथ कार्यान्वयन गर्न जोड दिए।
बैठकमा गृह मन्त्रालय, रक्षा मन्त्रालय, राष्ट्रिय विपद् जोखिम न्यूनीकरण तथा व्यवस्थापन प्राधिकरण र सडक विभागका तर्फबाट भइरहेको पूर्वतयारी बारेमा जानकारी गराइएको थियो।
बैठकमा गृहमन्त्री रमेश लेखकले सम्भावित जोखिमलाई ध्यान दिँदै तीनवटै सुरक्षा निकाय अलर्टमा बसेको, सेना र नीजि क्षेत्रका हेलिकप्टर समेत विपद्मा परिचालन गर्नुपर्ने अवस्थामा तयारी अवस्थामा रहेको बताए।
मौसम पूर्वानुमानअनुसार जोखिम रहेका सडकहरूमा सवारी सञ्चालन नगर्नु भनेको अवस्थामा सवारी चलेमा र केही भएमा त्यसको जिम्मेवार सम्बन्धित जिल्लाको प्रमुख जिल्ला अधिकारी र अन्तिम चेकपोस्टको प्रहरी इञ्चार्ज हुने गरि निर्देशन पठाइसकिएको जानकारी दिए।
मुख्य सचिव एकनारायण अर्यालले मौसम पूर्वानुमान अहिले मिलिरहेको भन्दै त्यसलाई ध्याद दिएर सम्बन्धित निकायलाई सोहीअनुसार अलर्टमा राखिएको बताए।
बैठकले स्थानीय एफएम र सामाजिक सञ्जालमार्फत मौसम बुलेटिन तथा सूचना प्रशारण गर्न व्यवस्था मिलउाउने निर्णय गरेको छ।
यसअघि नै प्राधिकरणले तीन प्रदेशका १२ जिल्लामा अलर्ट जारी गरिसकेको छ।
प्राधिकरणले लुम्बिनी प्रदेशका बाँके, बर्दिया र दाङ, कर्णाली प्रदेशका सुर्खेत, सल्यान र दैलेखमा सतर्कता अपनाउन भनेको छ। सुदूरपश्चिम प्रदेशका बैतडी, डडेलधुरा, डोटी, अछाम, कैलाली, कञ्चनपुरमा भारीदेखि धेरै भारी वर्षाको सम्भाव्यता औंल्याएको छ। अन्य प्रदेशका पहाडी भू–भागका एक–दुई स्थानमा पनि भारीदेखि धेरै भारी वर्षा हुनसक्ने विभागको अनुमान छ।
