सर्वोच्च अदालतमा प्रस्तावित न्यायाधीश मेघराज पोखरेलले न्याय पालिकामा दबाब, प्रलोभन र धम्की आउन सक्ने बताएका छन्।
आइतबार सिंहदरबारमा बसेको संसदीय सुनुवाइ समितिको बैठकमा आफ्नो कार्ययोजना प्रस्तुत गर्दै उनले न्यायाधीश बनेपछि आफूलाई दबाब, प्रलोभन र धम्की आउनसक्ने भन्दै त्यसमाथि उठेर निर्णय गर्नुपर्ने बताएका छन्।
‘कानून व्यवसायीहरूले एउटा न एउटाको पक्षधरमै काम गर्नुपर्छ। तर न्यायाधीश भएपछि न्यायाधीशको पक्ष हुँदैन। न्यायकर्मीको जिम्मेवारी पाएँ भने मेरो जुन रोल थियो, त्यसलाई परिवर्तन गरेर संविधान, कानून र न्यायको पक्षमा अब्बल सावित गर्नेछु,’ उनले भने, ‘न्यायपालिका स्वतन्त्र र निष्पक्ष हुनुपर्छ। त्यस्तो दृष्टिकोण न्यायाधीशले राख्नुपर्छ। यसको लागि न्याय पालिकामा दबाब, प्रलोभनहरू आउनसक्छन्। धम्की आउनसक्छन्। त्यो भन्दा माथि उठेर निर्णय गर्नुपर्छ। कार्यपालिका र व्यवस्थापिका सँगको सम्बन्धमा पनि न्यायपालिकाको भूमिका हुन्छ।’
उनले सबैले संविधानभित्रै रहेर काम गर्नुपर्ने बताएका थिए।
संविधानको सीमाभित्र रहेर काम गर्न नसके मुलुकमा गतिरोध हुने जिकिर गरे।
पोखरेल हाल सर्वोच्च बार एशोसिएसनमा अध्यक्ष छन्।
गत जेठ २७ गते न्याय परिषदले उनीसहित तीन जनालाई सर्वोच्चको न्यायाधीशका लागि सिफारिस गरेका थिए। उनीसहित उच्च अदालत जनकपुरका मुख्य न्यायाधीश श्रीकान्त पौडेल र उच्च अदालत दिपायलका मुख्य न्यायाधीश शान्तिसिंह थापा पनि न्यायाधीशका लागि सिफारिस भएका थिए।
सर्वोच्च अदालतमा चार वटा न्यायाधीशको पद रिक्त थियो। अझै एक न्यायाधीशको पद रिक्त नै छ।
—न्युज एजेन्सी नेपाल
