नेकपा (एमाले)की केन्द्रीय सदस्य उमा कोइरालाले पार्टीको नेतृत्व केपी शर्मा ओलीकै हुनुपर्ने स्पष्ट पारेकी छन्।
मदन भण्डारीको ७४ औं जन्मजयन्तीका अवसरमा सिन्धुलीमा आयोजित माल्यार्पण सभामा बोल्दै कोइरालाले पूर्वराष्ट्रपति विद्यादेवी भण्डारीको सक्रिय राजनीतिमा पुनः प्रवेशका लागि भइरहेको चर्चा आवश्यक नरहेको भन्दै रोक्नुपर्ने बताएकी हुन्।
'अब अध्यक्ष केपी ओली नै हुन्। अहिले विद्याजीको नाम अघि ल्याउनु आवश्यक छैन। विद्या जीलाई अगाडि ल्याएर राजनितिक रोटी सेक्न केही साथीहरू लाग्नुभएको छ । त्यो अहिले सम्भव छैन । अव हुने विधान महाधिवेशन र ११ औं महाधिवेशनले पुनः केपी ओलीलाई नै अध्यक्ष बनाउनेमा विश्वास लिएको छु,' उनले भने।
उनले पार्टीभित्रका असमझदारी र गुटगत गतिविधिका विषयमा पनि उल्लेख गर्दै पार्टीमा समस्या र असमझदारी पर्न सक्ने र आन्तरिक छलफलमार्फत समाधान गर्नुपर्ने र बाहिर चाहिँ एकताको सन्देश दिनुपर्ने बताइन्।
कोइरालाले मदन भण्डारीले अघि सारेको जनताको बहुदलीय जनवाद (जबज) अहिले पनि उत्तिकै सान्दर्भिक रहेको उल्लेख गर्दै भनिन्, 'मदनको विचार र ओलीको नेतृत्व नै आजको आवश्यकता हो।'
यसैबीच, मदन भण्डारीको जन्मजयन्तीका अवसरमा देशभर कार्यक्रमहरू भइरहेका छन्। शनिबार काठमाडौंको राष्ट्रिय सभागृहमा प्रधानमन्त्री तथा एमाले अध्यक्ष ओली, पूर्वराष्ट्रपति भण्डारीलगायत शीर्ष नेताहरूको सहभागितामा विशेष कार्यक्रम हुँदैछ।
