प्रधानमन्त्री केपी शर्मा ओलीले सरकारको नीति तथा कार्यक्रमबारे सांसदहरूले उठाएको प्रश्नमा जबाफ दिइरहेका छन्।
आइतबार प्रतिनिधि सभामा प्रधानमन्त्री ओलीले सुरूमा नीति तथा कार्यक्रममाथिको छलफलमा सांसदहरूले उठाएका प्रश्नहरूको जबाफ दिएका थिए।
त्यसपछि प्रधानमन्त्रीको जबाफप्रति सांसदहरूले स्पष्टीकरण सोधेका थिए।
स्पष्टीकरणको जबाफ दिने क्रममा प्रधानमन्त्री ओलीले मार्सी चामलको कुरा निकालेपछि संसदमा हाँसो गुञ्जिएको थियो।
त्यतिबेला कर्णालीको विकासबारे प्रधानमन्त्री ओलीले जबाफ दिँँदै थिए।
त्यस क्रममा प्रधानमन्त्री ओलीले कर्णालीको विकासमा सरकारको ध्यान पुगेको र त्यहाँ स्वास्थ्य विज्ञान प्रतिष्ठनदेखि सडक, विमानस्थल र अरू विद्यालयहरू बनाइएको बताए।
सिंजा उपत्यकालाई तदनुसार विकास गर्न त्यहीँबाट मुगु कर्णाली जाने रारा पुग्ने बाटो त्यहीँबाट बनेको प्रधानमन्त्री ओलीले बताए।
चन्दननाथ विमानस्थलको कुरा गर्दा प्रधानमन्त्री ओलीले मार्सी चामलको विषय निकालेका हुन्।
'चन्दननाथमा एयरपोर्ट छ। अगाडिदेखि त्यहाँ सन्त चन्दननाथले मार्सी चामल ल्याएर.. । अहिले व्यापक रूपमा चर्चित पनि छ कर्णालीको, जुम्लाको मार्सी चामल। मैले पनि कर्णालीको मार्सी चामल चाखेको कुरा यहाँहरूलाई जानकारी नै होला,' प्रधानमन्त्री ओलीले भने।
'कर्णालीमा धेरै काम भएका छन्।तर पर्याप्त भएको छैन। अझै विकास गर्न जरूरी छ,' उनले भने।
-1746009348.jpg)
