केन्द्रीय सुरक्षा समितिको बैठक गृह मन्त्रालयमा बसेको छ।
बुधबार दिउँसो गृहमन्त्री रमेश लेखकको अध्यक्षतामा केन्द्रीय सुरक्षा समितिको बैठक बसेको हो।
मन्त्री लेखकको सचिवालयका अनुसार भारत-पाकिस्तानबीच सुरू भएको तनावलाई लिएर करिब एक घण्टा छलफल भएको हो।
छलफलमा त्यसले नेपाललाई पर्ने असरबारे पनि कुराकानी भएको सचिवालय स्रोतले बतायो।
त्यस्तै सबै सुरक्षा संयन्त्रलाई उच्च सतर्कता राख्ने, सीमा क्षेत्रमा जाँच कडा पार्ने लगायत विषयमा पनि छलफल भएको थियो।
अन्तर्राष्ट्रिय विमानस्थलमा पनि कडाइका साथ जाँच गर्ने विषयमा छलफल भएको स्रोतले बतायो।
छलफलमा नेपाल प्रहरीका आइजिपी दीपक थापा, सशस्त्र प्रहरी बलका आइजिपी राजु अर्याल, राष्ट्रिय अनुसन्धान विभागका प्रमुख हुतराज थापा र नेपाली सेनाका बलाधिकृत रथी निर्मल कुमार थापा सहभागी थिए।
सशस्त्र प्रहरी बलले यससँगै पछिल्लो घटनाक्रमपछि सीमा क्षेत्रमा उच्च सतर्कता अपनाउन थालेको हो।
सीमा क्षेत्रलाई व्यवस्थित गर्न र हुनसक्ने अवैध घुसपैठलाई रोक्न नेपाल प्रहरी, राष्ट्रिय अनुसन्धान विभाग तथा स्थानीय जनप्रतिनिधि तथा सर्वसाधारणसँग समेत समन्वय गरी सूचना आदान–प्रदान गरी सीमामा आवतजावत गर्ने गरी वारपार गर्नेलाई निगरानी गर्ने कार्य समेत कडाईकासाथ गरिएको सशस्त्र प्रहरी बलका सहप्रवक्ता एवं डिएसपी शैलेन्द्र थापाले जानकारी दिए।
