भारत र पाकिस्तानबीच आक्रमण सुरू भएको छ।
जम्मू कश्मिरको पहलगाममा अप्रिल २२ मा भएको आतंकवादी आक्रमणमा एक नेपालीसहित २६ मारिएको घटनाको १५ दिनमा भारतले पाकिस्तानमाथि आक्रमण गरेको हो।
अप्रिल २२ यता दुई देशले एक अर्कालाई विभिन्न विषयमा प्रतिबन्ध लगाउँदै आएका थिए।
उडान प्रतिबन्ध, एक देशका नागरिकहरुलाई अर्को देशमा आवतजावत गर्न प्रतिबन्ध, आयात-निर्यात प्रतिबन्ध, सम्झौता निलम्बन हुँदै बुधबार आक्रमणसम्म पुगेको हो।
भारतीय अखबार द हिन्दुस्तान टाइम्सका अनुसार भारतले पाकिस्तानका विभिन्न ९ क्षेत्रहरूमा लक्ष्य गरेर मिसाइल आक्रण गरेको छ।
बहालपुर, मुरिद्के, सर्जल, शियालकोट, बर्नाला, कोट्ली, मुजफ्फरवाद लगायतका विभिन्न ठाउँमा भारतले मिसाइलले हानेको हिन्दुस्तान टाइम्सको समाचारमा उल्लेख छ।
ती क्षेत्रहरू आतंकवादी संगठनहरूको आधार इलाका रहेको दाबी भारतीय पक्षको छ।
भारतले यसलाई 'अपरेशन सिन्दुर' नाम दिएको छ।
पाकिस्तानी अधिकारीहरूले आक्रमणबाट कम्तिमा ८ जनाको मृत्यु र ३५ जना घाइते भएको बताएको छ।
पाकिस्तानले भारतीय आक्रमणको जबाफ दिने भनिसकेको छ।
उसले भारतीय पक्षले हानेको ५ वटा फाइटर जेट खसालेको दाबी पनि गरेको छ।
फ्रान्समा निर्मित तीनवटा राफेल विमान र दुइटा रुसमा बनेका लडाकु जहाज खसालेको पाकिस्तानले दाबी गरेको समाचार संस्था रोयटर्सले जनाएको छ।
विमान खसालेको पाकिस्तानी दाबीबारे भारतले अहिलेसम्म कुनै प्रतिक्रिया दिएको छैन। यदि यो पुष्टि भयो भने, यो भारतीय सेनाको लागि दशकौँपछिको सबैभन्दा ठूलो क्षति हुनेछ।
राफेल लडाकु विमान भारतीय सेनाको आधुनिकीकरण गर्ने योजना अन्तर्गत भारतले किनेको हो।भारतीय वायुसेनासँग ३६ वटा राफेल लडाकु विमान छ।
भातरले आतंकवादीहरूको आधार इलाका भनेर मिसाइल हानेपछि पाकिस्तानी सेनाले कश्मिरमा गरेको बमबारीमा परी तीन भारतीयको मृत्यु भएको रोयटर्सले जनाएको छ।
पाकिस्तानमाथिको आक्रमणबारे भारतीय पक्षले आधिकारिक रूपमा अहिलेसम्म कुनै विवरण सार्वजनिक गरेका छैनन्। भारतीय विदेशमन्त्री यस जयशंकर, गृहमन्त्री अमित शाह लगायतले सामाजिक सञ्जालमा लेख्दै आतंकवादविरूद्ध 'अपरेशन सिन्दुर' चलाइएको बताएका छन्।
जयशंकरले आतंकवादविरूद्ध शून्य शहनशीलताको नीति अवलम्बन गरिनुपर्ने बताएका छन्। गृहमन्त्री अमित शाहले भारतीय सेनाप्रति गर्व रहेको भनेका छन्।
आक्रमणपछि दुवै देशका विभिन्न क्षेत्रहरूका विद्यालय बन्द गरिएका छन्।
पाकिस्तानमा हवाइ आक्रमणपछि अन्तर्राष्ट्रिय उडानहरु प्रभावित भएका छन्। धेरै एशियाली एयरलाइन्सहरूले युरोप जाने र फर्कने उडानहरू रद्द गरेको रोयटर्सले जनाएको छ।
विशेषगरी ताइवान, दक्षिण कोरिया, थाइल्याण्ड, भियतनामका विभिन्न उडान र भारतीय एयलराइन्सहरू एयर इन्डिया, इन्डिगो, स्पाइसजेट लगायतका विमानहरूले उडान रद्द गरेका छन्।
सिंगापुर एयरलाइन्स, ब्रिटिश एयरवेज, फिनएयर, एयरोफ्लोट जस्ता एयरलाइन्सहरूले पनि रूट परिवर्तन गरेका छन्।
भारतले गरेको आक्रमणबारे संयुक्त राष्ट्रसंघ, अमेरिका र चीनले प्रतिक्रिया जनाइसकेका छन्।
संयुक्त राष्ट्रसंघले दुवै देशलाई संयमता अपनाउन आग्रह गरेको छ भने चीनले आक्रमणलाई खेदजनक भनेको छ। चीनले घटनालाई नजिकबाट नियालीरहेको र दुवैलाई संयमता अपनाउन आग्रह गरेको छ।
अमेरिकी राष्ट्रपति डोनाल्ड ट्रम्पले आक्रमण बन्द हुने आशा व्यक्त गरेका छन्। उनका विदेशमन्त्री मार्को रूबिओले भने घटनालाई नजिकबाट नियालीरहेको बताएका छन्।
भातरले आक्रमणबारे जानकारी दिन पत्रकार सम्मेलनको तयारी गरेको रोयटर्सले लेखेको छ।
