प्रधानमन्त्री एवं नेकपा एमाले संसदीय दलका नेता केपी शर्मा ओलीले संसदभित्र आफ्नो प्रश्तुति प्रभावकारी बनाउन सांसदहरुलाई निर्देशन दिएका छन्।
शनिबार बालुवाटारमा बसेको पार्टीको संसदीय दलको बैठकमा उनले पार्टीको मर्यादा र अनुशासन कायम राख्दै प्रस्तुती प्रभावकारी बनाउन निर्देशन दिए।
त्यसका लागि आफूले बोल्ने विषयहरू बुँदागत टिपेर ल्याउन निर्देशन दिए।
'प्वाइन्टहरु साथीहरुले लेखेर ल्याउनुहोला बोल्ने बेलामा, लेखेका प्वाइन्टहरु बोल्नुहोला ताकी कुरा नछुटोस् , नबिर्सियोस्। लेखेर ल्याएको बुँदाहरु प्रष्टताका साथ व्याख्या गर्न सक्नेगरी आउनुपर्यो। सिङ्गै वक्तव्य लेखेर ल्याएपनि हुन्छ,' उनले भने।
उनले संसदमा गलत विषयहरू उठे प्रतिवाद गर्न पनि निर्देशन दिएका छन्।
'लेखेर ल्याएको वक्तव्यमा तत्काल उठेका प्रश्नको जवाफ दिन सकिँदैन, असहज हुन्छ । तत्काल उठेका कुराहरुको प्रतिवाद हामीले गर्नैपर्ने हुन्छ । हरेक सांसदहरुले गलत कुरामा उठेको खण्डनहरुमा पनि बोल्नैपर्ने हुन्छ । त्यस ढंगले आफूलाई प्रश्तुत गरेर आउनू,' उनले भने।
