प्रधानमन्त्री केपी शर्मा ओलीले कोशी प्रदेश सरकारले आयोजना गरेको लगानी सम्मेलनको बिहीबार उद्घाटन गरेका छन्।
लगानीका निम्ति उपयुक्त वातावरण छ भन्ने सन्देश दिन सम्मेलन गरिएको प्रदेश सरकारले जनाएको छ।
विराटनगरमा आयोजित सम्मेलन उद्घाटन गर्दै प्रधानमन्त्री ओलीले नेपालमा लगानीका लागि उपयुक्त वातावरण रहेकाले ढुक्क भएर लगानी गर्न स्वदेशी र विदेशी लगानीकर्तालाई आग्रह गरेका थिए।
नेपालमा लगानीका निम्ति उपयुक्त वातावरण रहेकाले आन्तरिक र बाह्य लगानी परिचालनमा ध्यान दिन प्रशासनिक क्षेत्रलाई पनि प्रधानमन्त्री ओलीले आग्रह गरेका थिए।
‘पूर्वाधार निर्माण भइसकेको समय भएकाले ढुक्कले लगानी गर्न सक्नुहुन्छ। लगानीका लागि सरकारका तर्फबाट कुनै समस्या पर्न दिइन्न। कोशी प्रदेश पूर्वाधार विकास र सडक सञ्जालसँग जोडिएको छ। लगानी गरेर उत्पादन बजारमा लाने समयसम्म एसियालीस्तरको छ लेनको पूर्व-पश्चिम राजमार्ग हामी बनाइसक्छौं। हामी कच्चा पदार्थ पनि ल्याउन सक्छौं। त्यसकारण हरेक क्षेत्रमा नयाँ नयाँ सम्भावनाहरूलाई हामीले पहिल्याउन सक्छौं,’ प्रधानमन्त्री ओलीले भने, ‘देशमा सामान ल्याउन र लान कुुनै हिसाबले रोकिँदैन। आफ्नो उत्पादनको बजार कोशी प्रदेशका विभिन्न कोरिडोर र नाकामा लान सक्ने गरी बाटो बनिसकेको छ। विराटनगरसहित विभिन्न विमानस्थल विस्तार गरिनेछ। सांस्कृतिक, धार्मिक र पर्यटकीय क्षेत्रका साथै सगरमाथासहित विभिन्न हिमाल र जडिबुटीहरूको थलो कोशीका जनता शिक्षित र मेहनती छन्। त्यस कारण पनि यहाँ लगानीको प्रचुर सम्भावना रहेको छ।’
प्रधानमन्त्री ओलीले उद्यमशीलता दशक मनाउन सकिए रोजगारी दशक सफल हुने उल्लेख गर्दै जागिरको खोजीमा नभौतारिन युवाहरूलाई आग्रह गरे।
‘उद्यमशीलतामा लाग्नुस्। त्यसका लागि सोच, तालिम र सहयोगमा सरकारले साथ दिन्छ,’ उनले भने। प्रधानमन्त्री ओलीले विश्वको सर्वाेच्च शिखर सगरमाथालाई सगरमाथाकै नामबाट विश्वमा ब्राण्डिङ गर्न आग्रह गर्दै ‘माउन्ट एभरेष्ट’ भनिरहन नपर्नेमा जोड दिए।
