चैत १५ गते भएको तीनकुने घटनामा संलग्न रहेको आरोपमा पक्राउ परेका राप्रपाका वरिष्ठ उपाध्यक्ष रवीन्द्र मिश्रसहित २५ जनालाई काठमाडौं जिल्ला अदालतले एक आधारमा टेकेर थप सात दिन हिरासतमा राख्न म्याद दिएको छ।
राप्रपा वरिष्ठ उपाध्यक्ष मिश्र र मेडिकल व्यवसायीसमेत रहेका 'संयुक्त जनआन्दोलन समिति' ले तोकेका 'जनकमान्डर' दुर्गा प्रसाईंसहित २५ जनामाथि राज्यविरूद्धको कसुर र संगठित अपराध कसुरमा प्रहरीले अनुसन्धान गरिरहेको छ।
आइतबार सरकारी वकिलले उनीहरूलाई थप म्याद माग गर्दै जिल्ला अदालतका न्यायाधीश ईश्वरीप्रसाद भण्डारीको इजलासमा पेस गरेको थियो।
मिश्र र प्रसाईंले आफूहरूलाई हाजिर जमानीमा राख्नुपर्ने माग गरेका थिए। हाजिर जमानीमा छाड्ने कि नछाड्ने भन्ने विषयमा यसअघि चैत १० गते न्यायाधीश ध्रुवराज कार्कीको इजलासमा बहस भएको थियो।
उक्त इजलासले सरकारी पक्षलाई अनुसन्धान गर्दा के-कस्ता प्रमाण लिन बाँकी छन् भन्ने व्यहोरा नखुलाइ म्याद थप्न आएको भन्दै त्यसबारे सचेत गराएको थियो।
'यस स्थिति अवस्थामा अब म्याद थपको लागि माग गर्दा बयान लिन बाँकी प्रतिवादीको बयान लिने कार्य सम्पन्न गर्ने र बयान सम्पन्न भएका र बयान सम्पन्न भएका र बयान लिन बाँकी रहेका प्रतिवादीको बयान कार्य सम्पन्न पश्चात प्रतिवादीहरूको प्रहरी प्रतिवेदन अनुसारको कसुरमा संलगनता देखिने के कुन प्रमाण संकलन गर्न बाँकी रहेको हो सोको स्पष्ट विवरण सहित थप म्याद थपको माग गर्ने गरी हाललाई म्याद थपको लागि उपस्थित गराइएका प्रतिवादीहरूलाई अनुसन्धानका लागि प्रहरी हिरासतमा राख्न तीन दिनको म्याद थप प्रदान गरिएको छ,' आदेशमा भनिएको थियो।
त्यस्तै हाजिर जमानीमा वा साधारण तारेखमा राख्न सकिने भनेर अदालतले आदेशमा उल्लेख गरेको थियो। यसो हुँदा आइतबार रवीन्द्र मिश्र लगायतलाई म्याद थप होला वा नहोला भन्ने विषयमा पनि चासोको विषय बनेको थियो। न्यायाधीश ईश्वरीप्रसाद भण्डारीको इजलासमा आइतबार बेलुकी ७ बजेसम्म बहस भएको थियो।
बहसका क्रममा सरकारी वकिलले अनुसन्धानको क्रममा बुँदागत रूपमा प्रमाण संकलन गर्नुपर्ने विषयवस्तुहरू खुलाएको भण्डारी इजलासले जारी गरेको आदेशमा उल्लेख छ।
मिश्रका वकिल वरिष्ठ अधिवक्ता राजु बस्नेतका अनुसार सरकारी वकिलले प्रसाईंको हकमा ज्यान मार्ने उद्योग, आगजनीलगायत कसुरमा अनुसन्धान भइरहेको, क्षतिको विवरण संकलन गर्नुपर्ने, मोबाइल फरेन्सिक ल्याबमा पठाएको रिपोर्ट आउन बाँकी रहेकाबारे इजलासमा प्रस्तुत गरेका थिए। तर मिश्रका बारेमा अनुसन्धान गर्नुपर्ने कुराहरू सरकारी पक्षले उल्लेख नगरेको उनले बताए।
इजलासले भने रवीन्द्र मिश्रसहित २५ जनाकै हकमा माग गरिएको पत्रमा स्पष्ट र बुँदागत रूपमा मुद्दामा अनुसन्धान गर्नुपर्ने विषयवस्तु खुलाएको आदेशमा उल्लेख गरेको छ। त्यसकारण थप सात दिनको म्याद दिइएको भनिएको छ।
‘मिति २०८१/०१/१४ मा म्याद थप गर्न माग गरिएको पत्रमा स्पष्ट र बुँदागत रूपमा प्रस्तुत मुद्दामा बाँकी अनुसन्धान गर्नुपर्ने विषय भनी थप अनुसन्धानका विषयहरू उल्लेख गरी माग गरिएको समेतबाट उपस्थित गराइएका रवीन्द्र मिश्रसमेत २५ जना प्रतिवादीहरूलाई थप अनुसन्धानका निमित्त मुलुकी फौजदारी कार्यविधि संहिता, २०७४ को दफा १४ (६) बमोजिम ७ (सात) दिन म्याद थप गरिदिएको छ,’ आदेशमा भनिएको थियो।
दुर्गा प्रसाईंको आह्वानमा चैत १५ गते तीनकुने क्षेत्रमा प्रदर्शन भएको थियो। प्रदर्शनलाई नवराज सुवेदी नेतृत्वको 'संयुक्त जनआन्दोलन समिति' ले पनि समर्थन गरेको थियो। उक्त समितिमा रवीन्द्र मिश्र सदस्य सचिव थिए। यस्तै तीनकुने घटनामा राप्रपा महामन्त्री धवल शम्शेर राणा पनि पक्राउ परेका थिए। तर उनलाई उपचारका लागि भन्दै प्रहरीले हाजिरी जमानीमा छाडेको छ।
राजसंस्था पुनर्स्थापनाका लागि प्रदर्शन भएको तीनकुने घटनामा दुई जनाको मृत्यु भएको थियो भने निजी घर, जडिबुटी प्रशोधन केन्द्र, पार्टी कार्यालय, सरकारी गाडीमा आगजनी भएको थियो।
