नेपाली कांग्रेसकी सांसद प्रतिमा गौतमले राप्रपा सांसद राजेन्द्र लिङ्देनलाई लक्ष्य गर्दै 'सहमहामन्त्रीका छोराले रक्सी चोरेको' भन्दै संसदमै दिएको अभिव्यक्ति प्रमाणित गर्न चुनौती दिएकी छन्।
प्रतिनिधि सभाको सोमबारको बैठकमा उनले राप्रपा अध्यक्षसमेत रहेका लिङ्देनलाई अभिव्यक्ति पुष्टि गर्न वा भनाइ फिर्ता लिन भनेकी हुन्।
‘चैत १५ गते आपराधिक मनसायले ग्रसित हुलले व्यक्तिगत सम्पत्ति, पार्टी कार्यालय, भाटभटेनी स्टोरमा गरेको आगजनी र तोडफोड तथा लुटपाटको कुकृत्यपूर्ण घटनालाई ढाकछोप गर्न, विषयान्तर गर्न राप्रपा अध्यक्षले सदनमा उभिएर कांग्रेसका सहमहामन्त्रीका छोरा रक्सी चोरीको घटनामा संलग्न रहेको कपोल्कल्पित, भ्रामक तथा तथ्यहीन अभिव्यक्ति सुन्दा आश्चर्य लागेको छ,’ उनले भनिन्, ‘यो धमिलो पानीमा माछा मार्ने प्रवृत्तिको निरन्तरताका रूपमा म बुझ्दछु। बिनाप्रमाण कसैलाई आरोपित गर्न मिल्छ?’
साथै उनले लिङ्देनलाई कि उक्त भनाइ पुष्टि गर्न वा फिर्ता लिन आग्रह गरिन्।
‘कसैको राजनीतिक, सामाजिक प्रतिष्ठामा आँच आउने गरी गरिएको अभिव्यक्तिप्रति खेद व्यक्त गर्दै म लिङ्देनलाई उहााले बोलेका अभिव्यक्ति प्रमाणि गर्न चुनौती दिन्छु। उहाँले आफ्ना भनाइ यसै सदनबाट फिर्ता लिँदै माफी माग्नसमेत आग्रह गर्दछु,’ उनले भनिन्।
वैशाख १२ गतेको प्रतिनिधि सभामा बोल्दै लिङ्देनले भाटभटेनी लुटपाटमा नेपाली कांग्रेसका सहमहामन्त्रीको छोरा पक्राउ परे पनि तुरून्तै छाडिएको बताएका थिए।
यो पनि:
भाटभटेनी लुटपाटमा कांग्रेस सहमहामन्त्रीको छोरा पक्राउ परेका थिए, तुरून्तै छाडिएको थियो: राजेन्द्र लिङ्देन
